अभिजीत सोनावणे, साम टीव्ही

प्रियकराने लग्नाला नकार दिल्यामुळे एका अल्पवयीन मुलीने आत्महत्या केली आहे. तरूणाला दुसरी तरूणी पसंत पडल्याकारणाने त्याने प्रेयसीला लग्न करण्यास नकार दिला. या कारणामुळे तरूणीला मानसिक धक्का बसला आणि तिने टोकाचे पाऊल उचलले. ही धक्कादायक घटना नाशिकमध्ये घडली असून, याप्रकरणी पोलीस अधिक तपास करीत आहे.

नाशिकच्या शरणपूर रोडवर ही धक्कादायक घटना घडली आहे. वेदांत प्रवीण पाटील असे प्रियकराचे नाव आहे. तर, मृत तरूणीचे वय १७ होते. अल्पवयीन मुलगी आणि संशयित आरोपी वेदांत यांचे प्रेमसंबंध होते. गेले अनेक वर्ष त्यांचे रिलेशनशिप होते. मुलीचे १८ वर्षे पूर्ण झाल्यानंतर त्यांचे कुटुंब लग्न लावून देणार होते.

मात्र, वेदांतने प्रेयसीला लग्न करण्यास नकार दिला आहे. 'मला दुसरी मुलगी आवडते, तुझ्याशी लग्न करणार नाही' असं तरूणाने प्रेयसीला सांगितलं होतं. त्यानंतर तरूणीला मानसिक धक्का बसला. महिन्याभरापासून तिने आरोपीशी संपर्क साधण्याचा प्रयत्न केला. मात्र, तरूणाने लग्न करण्यास नकारच दिला.

मानसिक त्रास असह्य झाल्यामुळे तरूणीने टोकाचे पाऊल उचलण्याचे ठरवले. अल्वयीन मुलीने गळफास घेत आत्महत्या केली आहे. आत्महत्या केल्यानंतर मुलीच्या पालकांनी पोलीस ठाण्यात तक्रार दाखल केली. पोलीस ठाण्यात दाखल झालेल्या तक्रारीनुसार, वेदांत प्रवीण पाटील याला पोलिसांनी ताब्यात घेतले आहे. या प्रकरणी पुढील तपास पोलीस करीत आहेत.