Nagar News : सरकारने फसवी दुध दरवाढ केल्या असल्याचा आराेप करीत आज (शुक्रवार) स्वाभिमानी शेतकरी संघटनेसह शेतक-यांनी नगर मनमाड महामार्गावर रास्ता राेकाे आंदाेलन छेडलं आहे. यामुळे गेले एक तास झाले या मार्गावर रस्त्याच्या दुतर्फा वाहनांच्या लांबच लांब रांगा लागल्या. (Maharashtra News)

राज्य सरकारने दुधाला किमान 34 रुपये दर (milk price) देण्याची केलेली घोषणा हवेतच विरली आहे. प्रत्यक्षात दुध संघांकडून दूध उत्पादकांची आर्थिक लूट होत असून या विरोधात आज स्वाभिमानी शेतकरी संघटनेने नगर जिल्ह्यात रास्ता रोको आंदोलन करत सरकारचा निषेध केला.

राज्यातील दुध उत्पादक शेतक-यांना दिलासा देण्यासाठी सरकारने किमान 34 रूपये दर देण्याचा आदेश जारी केला. मात्र सरकारच्या आदेशाला दुध संघांनी केराची टोपली दाखवली असून शेतक-यांना प्रत्यक्षात 28 ते 30 रूपये दुधाला भाव दिला जा आहे.

त्यामुळे या विरोधात आज (शुक्रवार) राहुरी बाजार समिती समोर स्वाभिमानी शेतकरी संघटनेने नगर मनमाड महामार्ग अडवत रास्ता रोको केला. सरकारने केलेली घोषणा फसवी असून जर आठ दिवसांत यावर ठोस निर्णय घेतला नाही तर राज्यभर तीव्र आंदोलन छेडण्यासोबतच शहरांकडे जाणारे दूध बंद करण्याचा इशारा स्वाभिमानीच्या कार्यकर्त्यांनी दिला आहे. यावेळी सरकारचा निषेध करत जिल्हाध्यक्ष रवींद्र मोरे यांनी रस्त्यावरच स्वतःला दुधाचा अभिषेक घालत राज्य सरकारचा निषेध केला.

प्रमुख मागण्या

१) दुधाच्या ३:२ या गुणप्रतीस ३४ रुपये भाव मिळावा.

२) एसएनएफचा २० पैसे तर फँटचा ३० पैसे दर निश्चित करावा.

३) तेलंगणा आणि कर्नाटक राज्याच्या धर्तीवर शेतक-यांना प्रती लिटर ५ रुपये अनुदान द्यावे

४) पशुधनाला मोफत विमा सरंक्षण मिळावे

५) डबल टोन्ड दुधावर बंदी आणावी.

Edited By : Siddharth Latkar