योगेश काशिद, बीड प्रतिनिधी

Sushma Andhare Dhananjay Munde latest news : दिवाळी पाडव्याच्या निमित्ताने परळी शहरातील एका दुकानाच्या (शॉपच्या) उद्घाटन सोहळ्यात माजी मंत्री धनंजय मुंडे आणि शिवसेना (ठाकरे गट) उपनेत्या सुषमा अंधारे हे दोघे एकाच व्यासपीठावर आल्याचे पाहायला मिळाले. या वेळी सुषमा अंधारे यांनी आपल्या मनोगतात धनंजय मुंडे यांना भाऊबीजेच्या शुभेच्छा देताना केलेल्या मिश्किल राजकीय वक्तव्याने उपस्थितांचे लक्ष वेधून घेतले.

सुषमा अंधारे म्हणाल्या की, "परळीला नेहमी सत्ता केंद्र असण्याची सवय आहे. त्यामुळे धनंजय मुंडे यांचा उल्लेख 'माजी मंत्री' असा करताना काहीतरी वेगळेच वाटते. भाऊबीजेच्या निमित्ताने 'भाऊ' म्हणून धनंजय मुंडे यांना माझ्या शुभेच्छा आहेत." “भाऊ, इडा-पिडा टळू दे, बळीचं राज्य येऊ दे,” असे म्हणत त्यांनी पुढे मिश्किलपणे, “मी मात्र इडा-पिडा जाऊ दे आणि भाऊंचं राज्य येऊ दे, असे म्हणेन. पुढच्या दिवाळीला तुमचा उल्लेख मंत्री म्हणूनच करेन,” असे सूचक विधान केले.

सुषमा अंधारे यांच्या या वक्तव्यामुळे कार्यक्रमात एकच चर्चा रंगली. विशेष म्हणजे, राज्याच्या राजकारणात दोन्ही राष्ट्रवादी काँग्रेस एकत्र येण्याच्या चर्चांना उधाण आलेले असतानाच, अंधारे यांनी धनंजय मुंडे यांच्याबाबत केलेल्या या वक्तव्याचे राजकीय वर्तुळात वेगवेगळे अर्थ लावले जात आहेत.

भाऊबीजेच्या शुभेच्छांच्या निमित्ताने सुषमा अंधारे यांनी धनंजय मुंडे यांच्या राजकीय पुनरागमनाबाबत व्यक्त केलेली अपेक्षा सध्या राजकीय चर्चेचा विषय ठरत आहे.