Sunetra Pawar appointed guardian minister of Beed and Pune : उपमुख्यमंत्री सुनेत्रा पवार यांची बीड आणि पुणे जिल्ह्याच्या पालकमंत्री म्हणून नियुक्ती झाली आहे. अजित पवार यांच्या निधनानंतर या दोन जिल्ह्याच्या पालकमंत्रीपदाची जबाबदारी कुणाकडे जाणार? याची राजकीय चर्चा सुरू झाली होती. बीड आणि पुणे जिल्ह्याच्या पालकमंत्रिपदाचा शासन निर्णय आज जारी करण्यात आला आहे. बीड आणि पुण्याचे पालकत्व आजपासून सुनेत्रा पवार यांच्याकडे राहणार आहे. (Beed Pune guardian minister latest government decision)

महाराष्ट्र राज्य सरकारने आज एक महत्त्वपूर्ण निर्णय घेत सुनेत्रा अजित पवार यांची पुणे आणि बीड जिल्ह्याच्या पालकमंत्रीपदी नियुक्ती केली आहे. उपमुख्यमंत्री अजित पवार यांच्या निधनानंतर रिक्त झालेल्या या जागांवर ही नियुक्ती करण्यात आली आहे. राज्य सरकारच्या सामान्य प्रशासन विभागाने आज (३ फेब्रुवारी २०२६) यासंदर्भातील शासन निर्णय (GR) जारी केलाय.

दिवंगत उपमुख्यमंत्री अजित पवार यांच्याकडे बीड आणि पुणे या दोन्ही जिल्ह्यांचे पालकमंत्रीपद होते. मात्र, त्यांच्या आकस्मिक निधनामुळे ही पदे रिक्त झाली होती. प्रशासकीय कामकाज सुरळीत चालण्यासाठी तातडीने ही नवी नियुक्ती करण्यात आली आहे. राज्यपालांच्या आदेशानुसार हा निर्णय घेण्यात आला आहे. पुणे आणि बीड या दोन्ही जिल्ह्यांमध्ये विकासकामांना गती देणे आणि स्थानिक प्रशासनावर पकड मिळवणे हे आता नवनियुक्त पालकमंत्री सुनेत्रा पवार यांच्यासमोरील मुख्य आव्हान असणार आहे.