गणेशोत्सव, दहीहंडी, पोळा सारखे सण तोंडावर आले असतानाच साखरेच्या दरात मोठी वाढ झालीय. गोडधोडाच्या सणांवर साखरेच्या वाढत्या दरांचे कडवटपणा आलाय. किरकोळ बाजारात साखर 60 ते 70 रुपये किलोपर्यंत पोहोचल्याने गृहिणींचे बजेट देखील कोलमडले आहे. साखरेच्या वाढत्या दरामुळे आता चहाच्या कटिंग कपचे दरही महागलेत.

सकाळची चहाची तलफ आता खिशाला चटका देणार आहे. गेल्या आठ दिवसांत साखरेच्या दरात झपाट्याने वाढ झाल्याने चहा कॅटिंग चालकांनी दर वाढवलेत. दहा रुपयांचा कटिंग चहा आता थेट वीस रुपयांवर पोहोचला आहे. त्यामुळे चहाप्रेमींच्या कपात चहा कमी आणि महागाईची कडवट चव अधिक जाणवणार आहे.

श्रावणात उपवास, नैवेद्य आणि सणासाठी गोड पदार्थांना मोठी मागणी असते. लाडू, पुरणपोळी, खीर, बासुंदी यासाठी लागणारी साखरच महाग झाल्यानं लोकांच्या ताटातील पुरणपोळी गायब झालीय. गेल्या वर्षीच्या तुलनेत साखरेच्या दरात20 ते 25 रुपयांनी वाढ झाली आहे.

सणासुदीत साखर महागली, राजू शेट्टींचा गंभीर आरोप

साखर 7 हजार 500 प्रति क्विंटलवर गेलीय. तर वाशिम जिल्ह्यात किरकोळ बाजारात साखरेचे दर 80 रुपयांवर गेलेत. याचा ग्राहकांना मोठा आर्थिक फटका बसतोय. साखर दरवाढीनंतर आता शेतकरी नेते राजू शेट्टी यांनी काही सवाल उपस्थित करत सरकारकडे मोठी मागणी केली आहे. साखरेची अचानक झालेली दरवाढ संशयास्पद आहे.

साखरेचे दर वाढले तर माझ्यासारख्या नेत्याला आनंद झाला असता, मात्र हे पैसे शेतकऱ्यांना नाहीतर व्यापाऱ्यांच्या घशात जाणार आहेत. दिवाळीपर्यंत पुरेल इतका साखरेचा साठा यंदाच्या हंगामातील आहे आणि पुढील उत्पादन देखील देशाला पुरेल इतकं असताना अचानक दर कसे काय वाढले असा गंभीर सवालही त्यांनी यावेळी केला.