घरची आर्थिक परिस्थितीमुळे पाचवी पर्यंतचे शिक्षण घेतलेल्या वडीलांनी छोट्या गॅरेज व्यवसायावर सहा माणसाचं कुटुंब चालवत दोन मुलींना शिक्षण दिल. त्यामुळे सोलापूरच्या गवळी वस्ती सारख्या झोपडपट्टीत पत्र्याच्या घरात अभ्यास करुन दोन सख्या भगिनींनी एमपीएससी परीक्षेत यश मिळवले आहे.

संजीवनी आणि सरोजिनी भोजने अशी एमपीएससी परीक्षेत यश मिळवलेल्या त्या दोन सख्ख्या भगिनींची नावे आहेत.तर गरीब परिस्थितीतून मुलींना शिक्षण देणारे ज्योतीराम आणि रेश्मा भोजने अशी आई-वडिलांची नावे आहेत.

जोतिराम भोजने यांनी पाचवी पर्यंत शिक्षण घेतले असून गॅरेज चालक अशी वडीलांची ओळख आहे.घरची गरीब स्थिती असताना देखील वडिलांनी शिक्षण शिकवल्यानेच हे यश मिळाले असल्याच्या भावना संजीवनी आणि सरोजिनी यांनी व्यक्त केल्या आहेत.

घरची परिस्थिती हलाखीची असतानाही दोघी भगिनींनी बीकॉम पर्यंत शिक्षण पूर्ण केले.2018 पासून दोन्ही भगिनींनी महाराष्ट्र राज्य लोकसेवा आयोगाच्या परीक्षेची तयारी सुरू केली आहे.दररोज किमान 6 ते 7 तास सोलापुरात अभ्यास करुन त्यांनी या परीक्षेत यश मिळवलय.काल महाराष्ट्र राज्य लोकसेवा आयोगाचा निकाल हाती आल्यानंतर त्यांना ही आनंदाची बातमी समजली.

यामध्ये संजीवनी भोजने यांना मंत्रालयात महसूल सहाय्यक तर सरोजणी भोजने यांना कर सहाय्यक पोस्टिंग मिळाली आहे.त्यामुळे सध्या भोजने कुटुंबियांचा आनंद गगणात मावेनासा झाला आहे.अतिशय हलाकीच्या परिस्थितीतून या दोन भगिनींनी मिळवलेल्या या दैदीप्यामान यशाच सोलापूरमध्ये सर्वत्र कौतुक होत असल्याच चित्र दिसून येत आहे.