सोलापूरमध्ये चेन्नई एक्स्प्रेसवर दगडफेक करण्यात आल्याची घटना घडली आहे. धावत्या रेल्वेववर दगडफेक करण्याची ही १० दिवसांतली दुसरी घटना आहे. मुंबई - चेन्नई एक्स्प्रेसवर पारेवाडी - वाशिंबे दरम्यान दगडफेक करण्यात आली. मुंबई - सोलापूर वंदे भारत एक्सप्रेसवर दगडफेक झाल्याची घटना ताजी असतानाच ही घटना घडली आहे. अज्ञात व्यक्तींकडून पुन्हा मुंबई - चेन्नई एक्सप्रेसवर दगडफेक करण्यात आली आहे.

अवघ्या १० दिवसांत रेल्वेवर दगडफेक करण्यात आल्याची ही दुसरी घटना घडल्यामुळे आरपीएफ आणि लोहमार्ग पोलिसांच्या गस्तीवर प्रश्नचिन्ह निर्माण झाले आहे. या दगडफेकीत विकलांग डब्यात बसलेल्या एक प्रवासी किरकोळ जखमी झाला असून त्याला तात्काळ प्रथमोपचार देण्यात आले आहेत.

अनिकेत लहामुने असं जखमी व्यक्तीचं नाव असून तो पुणे ते कुर्डूवाडी असा प्रवास करत होता. या दगडफेकीमध्ये मोठी हानी झालेली नसली तरी रेल्वेच्या काचा फुटल्या असून प्रवाशांमध्ये भीतीचे वातावरण निर्माण झाले होते. याबाबत अज्ञात व्यक्तींविरोधात गुन्हा नोंद करण्याची प्रक्रिया सोलापूर लोहमार्ग पोलिस करत आहेत.