अमरावती: चांदूर रेल्वे शहरात १० ते १२ राज्यमंत्री बच्चू कडू यांच्या समर्थकांनी माजी आमदार वीरेंद्र जगताप यांच्या घरावर आज गुरूवारी सकाळी हल्लाबोल केला. विविध घोषणाबाजी करून दगडफेक केली. तसेच पुतळा सुध्दा घराबाहेर जाळल्याची प्राथमिक माहिती मिळाली आहे. १० ते १२ कार्यकर्ते अटकेत आहे. सोमवारी अमरावती जिल्ह्यात जिल्हा मध्यवर्ती सहकारी बँकेची निवडणूक पार पडली असून त्याचा निकाल ५ ऑक्टोंबर रोजी घोषीत झाला. त्या विजयाचे जल्लोष माजी आमदार वीरेंद्र जगताप, बबलू देशमुख, पालकमंत्री यशोमती ठाकूर हे जबाबदार लोक त्यांच्या कार्यकर्त्यांसमवेत साजरा करीत होते.

तेव्हा वीरेंद्र जगताप यांनी जोरजोरात घोषणाबाजी करीत असतांना राज्यमंत्री बच्चू कडू यांच्या विरोधात घोषणाबाजी करून त्यांच्या आई वर अश्लील घोषणाबाजी केली. यामुळे बच्चू कडू समर्थकांत प्रचंड नाराजी होती. अशातच आज गुरूवारी सकाळी वीरेंद्र जगताप यांच्या घरावर बच्चू कडू समर्थक पोहचले होते. यावेळी पोलीस स्टेशनवर काँग्रेस कार्यकर्त्यांची मोठी गर्दी जमली होती. पोलीस स्टेशनच्या बाहेर मोठा पोलीस बंदोबस्त तैनात असुन वीरेंद्र जगताप यांच्या घरासमोर सुध्दा बंदोबस्त आहे. यावेळी अप्पर पोलीस अधिक्षक शिशीकांत सातव चांदूर रेल्वेत पोहचले होते. तक्रार देण्याची प्रक्रीया सुरू आहे.

Edited By: Pravin Dhamale