भुषण अहिरे

धुळे: एसटी महामंडळाचे (MSRTC) राज्य शासनामध्ये विलगीकरण व्हावं या मागणीसाठी गेल्या सहा दिवसांपासून एसटी कर्मचाऱ्यांनी संप पुकारला आहे. या संपामागील एसटी कर्मचाऱ्यांची व्यथा व्यक्त करण्यासाठी धुळे आगारातील एका कर्मचाऱ्याच्या मुलाने रॅप सॉंगच्या माध्यमातून मांडण्याचा प्रयत्न केला आहे. एसटी कर्मचाऱ्यांच्या कुटुंबीयांना अल्प मानधनामुळे होत असलेला त्रास त्याचबरोबर एसटी कर्मचाऱ्यांची राज्य शासनातर्फे होत असलेली पिळवणूक दर्शविण्यासाठी व एसटी कर्मचाऱ्यांची व्यथा मांडण्यासाठी सध्या समाजामध्ये फॅड असलेल्या रॅप सॉंगचा आधार घेण्यात आला आहे.

धुळे आगारामध्ये कार्यरत असलेल्या शिपाई कौतिक सोनवणे यांच्या हर्षल सोनवणे या मुलाने हे रॅप सॉंग गाऊन झोपलेल्या राज्य सरकारला जागे करण्याचा प्रयत्न केला आहे. धुळ्यातील एसटी कामगाराच्या मुलाने सुरु असलेल्या संपाबाबत चित्रित केलेलं रॅप सॉंग सोशल मीडियावर मोठ्या प्रमाणात व्हायरल झाल्यामुळे सध्या चर्चेचा विषय ठरत आहे.

Edited By: Pravin Dhamale