गेल्या काही दिवसांपासून राज्यातील अनेक जिल्ह्यात मुसळधार पाऊस पडत आहे. काही जिल्ह्यांमध्ये शुक्रवारी अतिवृष्टी होईल, असा इशारा भारतीय हवामानशास्त्र विभागाने दिलाय. त्यामुळे दहावी-बारावीच्या पुरवणी परीक्षेदरम्यान शुक्रवारी होणारे पेपर पुढे ढकलण्यात आलेत,अशी माहिती महाराष्ट्र राज्य माध्यमिक व उच्च माध्यमिक शिक्षण मंडळाने दिलीय.

राज्य मंडळामार्फत जुलै ते ऑगस्ट महिन्यात परीक्षा घेण्यात येत आहे. दहावीची पुरवणी परीक्षा १६ ते ३० जुलै आणि बारावीची पुरवणी परीक्षा १६ जुलै ते ८ ऑगस्ट दरम्यान होत आहे. या परीक्षेत उद्या शुक्रवारी दहावीचा ‘विज्ञान आणि तंत्रज्ञान भाग दोन’ या विषयाचा पेपर सकाळी ११ ते दुपारी १ वाजेदरम्यान होणार होता. या पेपरची तारीख बदलण्यात आली असून हा पेपर आता ३१ जुलै रोजी सकाळी ११ ते दुपारी १ वाजेदरम्यान होईल.

तर बारावीच्या परीक्षेतील वाणिज्य संघटन व व्यवस्थापन, अन्नशास्त्र व तंत्रज्ञान आणि एम.सी.व्ही.सी. पेपर दोन (ईबी टू एक्सबी= २०) विषयांचे पेपर शुक्रवारी सकाळी ११ ते दुपारी २ वाजेदरम्यान होणार होते. आता हे पेपर ९ ऑगस्ट रोजी सकाळी ११ ते २ वाजेदरम्यान होणार आहेत. तर दहावी-बारावीच्या पुरवणी परीक्षेच्या लेखी आणि अन्य परीक्षेच्या उर्वरित वेळापत्रकामध्ये कोणताही बदल करण्यात आलेला नसल्याची माहिती राज्य मंडळाच्या सहसचिव मेधा निरफराके यांनी दिली.

दहावी-बारावीच्या परीक्षेचे बदललेले वेळापत्रक

दहावी : विज्ञान आणि तंत्रज्ञान भाग २ : २६ जुलै (वेळ- सकाळी ११ ते दुपारी १) : ३१ जुलै (वेळ -सकाळी ११ ते दुपारी १)

बारावी : १. वाणिज्य संघटन व व्यवस्थापन, २. अन्नशास्त्र व तंत्रज्ञान, ३. एम.सी.व्ही.सी पेपर २ (ईबी टू एक्स बी=२०) : २६ जुलै (वेळ सकाळी ११ ते दुपारी २) : ९ ऑगस्ट (वेळ सकाळी ११ ते दुपारी २)