विश्वभूषण लिमये, सोलापूर प्रतिनिधी

Bablad Zilla Parishad school accident latest news : सोलापूर जिल्ह्यातील अक्कलकोट तालुक्यातून एक धक्कादायक बातमी समोर आली आहे. बबलाद येथील जिल्हा परिषदेच्या कन्नड मध्यमाच्या शाळेत पोर्चमधील स्लॅबचा काही थर अचानक विद्यार्थ्यांवर कोसळला. या दुर्दैवी घटनेत १३ विद्यार्थी गंभीर जखमी झाले आहेत. सुदैवाने, सर्व जखमी विद्यार्थ्यांवर तात्काळ प्राथमिक उपचार करण्यात आले आहेत. सध्या त्या सर्व विद्यार्थ्यांची प्रकृती धोक्याबाहेर आहे.

नेमकी घटना काय?

अक्कलकोट तालुक्यातील बबलाद येथील जिल्हा परिषदेची शाळा जवळपास २५ वर्षे जुनी आहे. मंगळवारी दुपारच्या सुमारास विद्यार्थी पोर्च परिसरात खेळत होते. त्याचवेळी इमारतीच्या जुन्या झालेल्या स्लॅबचा भाग अचानक खाली पडला. स्लॅबचा हा थर थेट विद्यार्थ्यांच्या अंगावर कोसळल्याने तब्बल १३ मुले जखमी झाली. अचानक घडलेल्या या घटनेमुळे शाळेत आणि परिसरात एकच घबराट पसरली.

प्रशासनाची धावपळ आणि प्राथमिक उपचार

घटनेची माहिती मिळताच स्थानिक नागरिकांनी आणि शिक्षकांनी मदतीसाठी धाव घेतली. तात्काळ रुग्णवाहिका (ॲम्बुलन्स) मागवून जखमी विद्यार्थ्यांना वैद्यकीय मदतीसाठी हलवण्यात आले. तसेच, घटनेचे गांभीर्य लक्षात घेऊन जिल्हा परिषदेच्या वरिष्ठ अधिकाऱ्यांनी तातडीने घटनास्थळी धाव घेतली. जखमी विद्यार्थ्यांवर तात्काळ प्राथमिक उपचार करण्यात आले असून, त्यांना सुरक्षितपणे घरी सोडण्यात आले आहे.