सोलापूर : सोलापूर जिल्ह्यातील मोहोळ ते पंढरपूर या मार्गावर आज पहाटेच्या सुमारास धक्कादायक घटना समोर आली आहे. या मार्गावरील टोल नाक्यावर टोल न भरता बॅरिकेड्स तोडून ट्रक मार्गस्थ झाला होता. या ट्रकला थांबवण्यासाठी गेलेल्या कर्मचाऱ्याला चिरडल्याची घटना घडली. या या कर्मचाऱ्याचा मृत्यू झाला आहे. 

सोलापूर (Solapur) जिल्ह्यातील मोहोळ ते पंढरपूर पालखी मार्गावरील पेनूर टोल नाका आहे. या नाक्यावर पहाटे पाच वाजेच्या सुमारास हि घटना घडली आहे. या घटनेत हनुमंत अंकुश माने या टोल कर्मचाऱ्याचा मृत्यू झाला आहे. मोहोळ- पंढरपूर या पालखी मार्गावरून येणाऱ्या जाणाऱ्या वाहनांकडून टोल वसूल केला जात असतो. दरम्यान पहाटे मालवाहू ट्रक आला असता, चालकाने (Toll Plaza) टोल भरणा करण्यासाठी ट्रक टोल नाक्यावर न थांबविता, बॅरिकेड्स तोडून घेऊन भरधाव वेगाने मार्गस्थ झाला.  

दरम्यान टोल न भरताच ट्रक जात असल्याचे पाहून टोल नाक्यावरील कर्मचारी त्याला थांबविण्यासाठी धावले. मात्र चालकाने ट्रक वेगानेच काढला. यावेळी काही कारभारी बाजूला झाले. मात्र हनुमंत माने याला धक्का लागल्याने खाली पडून ट्रकच्या चाकाखाली सापडला. यात त्याचा मृत्यू झाला. संबंधित ट्रक चालक घटनास्थळी न थांबता पळून गेला असून मोहोळ पोलीस त्याचा शोध घेत आहेत. दरम्यान हि थरारक घटना सीसीटीव्ही कॅमेऱ्यात कैद झाली आहे.