विश्वभूषण लिमये, सोलापूर

बदलापूरमध्ये दोन चिमुकल्या शाळकरी मुलींवर शिपायाने लैंगिक अत्याचार केल्याची घटना ताजी असतानाच सोलापूरमध्ये अशाच प्रकारची धक्कादायक घटना घडली. सोलापूरमधील नामांकित शाळेमध्ये ही घटना घडली. या शाळेमधील शिपायाने चिमुकल्या मुलीचा लैंगिक छळ केला. याप्रकरणी या शिपायाविरोधात गुन्हा दाखल करत त्याला अटक करण्यात आली आहे. पोलिस याप्रकरणाचा तपास करत आहेत.

मिळालेल्या माहितीनुसार, सोलापूरमधील एका शाळेमध्ये शिपायाने चिमुकल्या मुलीचा लैंगिक छळ केला. या शिपायाने शाळेच्या परिसरातील बाथरुममध्ये नेऊन या मुलीचा लैंगिक छळ केला. पीडित मुलीच्या शरीरावरील विविध भागांवर या शिपायाने चिमटे काढत तिचा शारीरिक आणि मानसिक छळ केला. पीडित मुलीने हा संपूर्ण प्रकार पालकांना सांगितला तेव्हा ही घटना उघडकीस आली.

मुलीचा लैंगिक छळ केल्याप्रकरणी ५५ वर्षीय शिपायाविरोधात गुन्हा दाखल करण्यात आला आहे. फ्रान्सिस आशिष पिंटो असं या आरोपी शिपायाचे नाव आहे. डिसेंबर २०२४ पासून २४ मार्चपर्यंत या शिपायाने या मुलीचा लैंगिक छळ केला असल्याची माहिती समोर आली आहे. पीडित मुलीच्या नातेवाईकांनी दिलेल्या फिर्यादीवरून आरोपीविरोधात गुन्हा नोंद करण्यात आला असून पोलिसांनी त्याला अटक केली आहे. सोलापूरातील नामांकित शाळेत ही घटना घडल्यामुळे खळबळ उडाली आहे.

दरम्यान, बदलापूरमध्ये काही महिन्यांपूर्वी दोन चिमुकल्या शाळकरी मुलींवर शाळेमध्येच लैंगिक अत्याचार करण्यात आल्याची घटना घडली होती. शाळेतील शिपायानेच हे घाणेरडे कृत्य केले होते. याप्रकरणी संपूर्ण राज्यात संतापाची लाट पसरली होती. याप्रकरणी आरोपी अक्षय शिंदेविरोधात गुन्हा दाखल करत त्याला अटक करण्यात आली होती. या प्रकरणातील आरोपीचे पोलिसांनी एन्काऊंटर केले होते.