सोलापूर : राज्याच्या महिला आयोगाच्या अध्यक्षा रुपाली चाकणकर (Rupali Chakankar) यांच्या विरोधात फेसबुकवर आक्षेपार्ह कमेंट करणे २८ जणांना महागात पडले आहे. रुपाली चाकणकर यांच्या विरोधात फेसबुकवर (Facebook) आक्षेपार्ह प्रतिक्रिया करणाऱ्या २८ जणांविरोधात बार्शी शहर पोलीस ठाण्यात गुन्हा (Crime) दाखल करण्यात आला आहे. त्यामुळे या २८ जणांच्या अडचणी वाढल्या आहेत. ( Solapur Crime News In Marathi )

वटपौर्णिमेबाबत रुपाली चाकणकर यांनी भूमिका मांडली होती. 'आपण लग्न झाल्यापासून आतापर्यंत एकदाही वडाच्या झाडाला फेरे मारले नाहीत. नवऱ्यानेही कधी तसा हट्ट केला नाही, असा मजकूर सोशल मीडियावर प्रसारित झाला होता. त्या मजकूरावर युवराज ढगे याने आक्षेपार्ह प्रतिक्रिया दिली होती.

ढगेपाठोपाठ इतर जणांनी रुपाली चाकणकर यांच्याविरोधात आक्षेपार्ह प्रतिक्रिया दिल्या होत्या. या प्रतिक्रियांच्या विरोधात राष्ट्रवादी महिला काँग्रेसच्या जिल्हा उपाध्यक्ष सुवर्णा शिवपुरे यांनी ढगे विरोधात पोलिसात फिर्याद दिली. त्यानंतर पोलिसांनी चार दिवसांच्या कालावधीत महाराष्ट्राच्या विविध भागातील २८ जणांवर गुन्हा दाखल केला आहे. भांदवि कलम ५०९, ५००, ३५४ अ बाबी माहिती तंत्रज्ञान अधिनियम कलम ७७ नुसार गुन्हा नोंद करण्यात आला आहे.

चाकणकरांना मिळाली होती जीवे मारण्याची धमकी

राज्याचा महिला आयोगाच्या अध्यक्षा रुपाली चाकणकर (Rupali ChakanKar ) यांना जीवे मारण्याची धमकी मिळाली होती. राष्ट्रीय महिला आयोगाकडे हा धमकीचा फोन (Threat Call ) आला होता. त्यानंतर राष्ट्रीय महिला आयोगाकडून चाकणकरांना माहिती कळविण्यात आली होती. ७२ तासांत जीवे मारू, असा धमकीचा फोन आला होता. अहमदनगरमधील एका माथेफिरूनं ही धमकी दिल्याची माहिती मिळताच पोलिसांनी त्याला बेड्या ठोकल्या होत्या.