सोलापूर, ता. ११ ऑगस्ट २०२४

राज्यात मराठा आरक्षणाचा मुद्दा सध्या चांगलाच तापला आहे. आरक्षणाच्या मागणीसाठी राज्यभरात मराठा बांधव आक्रमक झाल्याचे पाहायला मिळत आहे. आज सोलापूरमध्ये मराठा बांधवांनी राष्ट्रवादी काँग्रेस पक्षाचे नेते शरद पवार यांची गाडी अडवली. मराठा आरक्षणाबाबत आपली आणि पक्षाची भूमिका स्पष्ट करा अशी मागणी यावेळी मराठा आंदोलकांनी केली.

सोलापूरमध्ये मराठा बांधव आक्रमक!

राष्ट्रवादी काँग्रेस शरदचंद्र पवार पक्षाचे अध्यक्ष शरद पवार हे सध्या विधानसभेच्या तयारीसाठी महाराष्ट्र दौरा करत आहेत. आज शरद पवार हे सोलापूर दौऱ्यावर असून बार्शीतील शरद शेतकरी संवाद मेळाव्याला ते हजेरी लावणार आहेत. या कार्यक्रमाला जाताना टेंभुर्णी कुर्डुवाडी रस्त्यावर मराठा बांधवांनी शरद पवार यांच्या गाडीचा ताफा अडवून मराठा आरक्षणाबाबत चर्चा केली.

शरद पवारांची गाडी अडवली

आंदोलकांनी मराठा आरक्षणाबाबत आपली आणि राष्ट्रवादी शरदचंद्र पवार पक्षाची अधिकृत भूमिका स्पष्ट करण्याची मागणी केली. आंदोलकांनी गाडी अडवताच शरद पवार यांनी दरवाजा उघडून त्यांचे म्हणणे ऐकून घेतले. तसेच मराठा आरक्षणाला आपला पाठिंबा आहे, असे आंदोलकांना सांगितले. यावेळी आंदोलकांकडून जोरदार घोषणाबाजी करण्यात आली.

शरद पवारांचा आज सोलापूर दौरा!

दरम्यान, शरद पवार आज बार्शी दौऱ्यावर आहेत. बार्शीमध्ये शरद शेतकरी संवाद मेळाव्याला ते हजेरी लावणार असून नवोदित खासदारांचा याठिकाणी सत्कारही होणार आहे. या कार्यक्रमाला माजी उपमुख्यमंत्री विजयसिंह मोहिते पाटील, खासदार धैर्यशील मोहिते पाटील, आमदार रोहित पवार आदी नेते उपस्थित आहेत.