Buldhana Latest News: बुलडाण्यामध्ये (Buldhana) उकळत्या दुधाच्या कढईमध्ये पडून सहा वर्षांची मुलगी गंभीर जखमी झाली होती. या चिमुकलीचा उपचारादरम्यान मृत्यू झाला आहे. या चिमुकलीची तब्बल तीन आठवड्यांची मृत्यूची झुंज अखेर अपयशी ठरली आहे. तिच्या मृत्यूमुळे कुटुंबियांना मोठा धक्का बसला आहे. या घटनेमुळे बुलडाण्यात हळहळ व्यक्त केली जात आहे.

बुलडाण्याच्या हनुमान चौकातील हनुमान दूध डेअरीचे संचालक युवराज जाधव नांदुरा रस्त्यावरील जाधववाडीत आपल्या कुटुंबीयांसोबत राहतात. 27 एप्रिल रोजी त्यांनी घराच्या आवारात व्यावसायानूरुप दैनंदिनीप्रमाणे मोठ्या कढईमध्ये दूध उकळण्यासाठी ठेवले होते. त्याचठिकाणी युवराज जाधव यांची सहा वर्षांची मुलगी ओमश्री इतर मुलांसोबत खेळत होती. खेळता खेळता ओमश्री उकळत्या दुधाच्या कढईमध्ये पडली.

ओमश्री कढईत पडल्याचे लक्षात येताच तिच्या कुटुंबीयांनी तिला कढईतून तात्काळ बाहेर काढले. गंभीर जखमी झालेल्या ओमश्रीला कोलते हॉस्पिटलमध्ये उपचारासाठी हलवले. पण प्राथमिक उपचारानंतर तिला जळगावला उपचारासाठी हलवण्यात आले. तिथे उपचार केल्यानंतर तिला मुंबईला उपचारासाठी हलवले. ओमश्रीवर शस्त्रक्रिया करण्यात आली. ती लवकर बरी होईल असे तिच्या कुटुंबीयांना वाटत होते.

पण बुधवारी पहाचे उपचारादरम्यान ओमश्रीने जगाचा निरोप घेतला. तब्बल तीन आठवड्यांनंतर ओमश्रीची मृत्यूंची झुंज अपयशी ठरली. चिमुकल्या ओमश्रीचा मृत्यू झाल्यामुळे तिच्या कुटुंबीयांना मोठा धक्का बसला. गुरुवारी सकाळी मौजे वाघुड येथील जाधव फार्मवर ओमश्रीवर शोकाकुल वातावरणात अंत्यसंस्कार करण्यात आले. या घटनेमुळे हळहळ व्यक्त केली जात आहे.