योगेश काशिद, बीड

मुलाच्या आत्महत्येचे दुःख सहन न झाल्याने आईने देखील टोकाचे पाऊल उचलत आयुष्य संपवल्याची धक्कादायक घटना समोर आली आहे. विष प्राशन करून आईने देखील आत्महत्या केली. गेवराई तालुक्यातील वाहेगाव आमला येथे ही हृदयद्रावक घटना घडली. मुलाने आत्महत्या केल्यानंतर आईनेही प्रचंड दुःखातून आत्महत्येचा मार्ग पत्करला. या दुहेरी आत्महत्येच्या घटनेमुळे संपूर्ण गावात शोककळा पसरली आहे.

मिळालेल्या माहितीनुसार, अभिमान खेत्रे (३६ वर्षे) या तरुणाने सोमवारी दुपारी गळफास घेऊन आत्महत्या केली. त्यांच्या आत्महत्येचे कारण अस्पष्ट आहे. अभिमान यांच्या आत्महत्येमुळे कुटुंबीयांना मोठा धक्का बसला. मुलाने आत्महत्या केल्याचे वृत्त कळताच अभिमान यांच्या आई कौशल्या भागुजी खेत्रे (७० वर्षे) यांना मोठा धक्का बसला. मुलाच्या आत्महत्येमुळे त्या प्रचंड मानसिक तणावात गेल्या.

कौशल्या खेत्रे यांनी देखील मुलाच्या आत्महत्येच्या काही तासांच टोकाचे पाऊल उचलले. त्यांनी विषारी औषध पिऊन आत्महत्या केली. अभिमानचा मृत्यू सोमवारी सायंकाळी ४ वाजता झाला. तर त्यांच्या आई कौशल्याबाई यांचा मृत्यू आज सकाळी १० वाजता उपचारादरम्यान झाला. एका घरात एकाच वेळी दोन मृत्यू झाल्याने संपूर्ण गावात हळहळ व्यक्त केली जात आहे. नातेवाईक, शेजारी आणि गावकरी मोठ्या दुःखात आहेत. अभिमान यांच्या आत्महत्येचे कारण अद्याप स्पष्ट झाले नसून पोलिस पुढील तपास करत आहेत.