नांदेडमधून धक्कदायक बातमी समोर आली आहे. नांदेडचा भूमिपुत्र मजुरीसाठी दुबईत गेला असता तिथे त्याचा मृत्यू झाल्याची माहिती मिळाली आहे. या घटनेनंतर त्याचा मृतदेह त्याच्या मूळगावी आणण्यासाठी त्याचे शेतकरी आई वडील विवंचनेत होते. मात्र स्थानिक आमदार भीमराव केराम व सरकारच्या मदतीने अखेर त्याचा मृतदेह मूळगावी आणण्यात आला आहे.

मिळालेल्या माहितीनुसार, नांदेडचा भूमिपुत्र श्याम अंगरवार ( वर्षे २८ ) काही महिन्यांपूर्वी तो मजुरी करण्यासाठी दुबई इथे गेला होता. या दरम्यान त्याची प्रकृती खालावली. आजारी पडल्याने त्याचा मृत्यू झाल्याचं स्थानिकांनी म्हटलं. श्याम अंगरवार याचे आई वडील दोघेही शेतकरी आहेत. मात्र मुलाच्या मृत्यूच्या बातमी नंतर त्यांच्या पायाखालची जमीन हादरली.

मुलाचा मृतदेह ताब्यात घेण्यासाठी श्यामचे आई वडील कासावीस झाले होते. दरम्यान स्थानिक आमदार भीमराव केराम यांना या प्रकरणाची माहिती समजताच अंगरवार कुटुंबियांच्या मदतीला धावून आले. केराम यांनी याप्रकरणी मुख्यमंत्री कार्यालयाशी संपर्क साधला. घडलेली हकीकत सांगितली. त्यानुसार, सरकारच्या मदतीने श्यामचा मृतदेह त्याच्या मूळगावी १२ ऑक्टोबर रोजी आणण्यात आला.

दरम्यान स्थानिक आमदार भीमराव केराम व सरकारने या प्रकरणात लक्ष घातल्यामुळे अंगरवार कुटुंबीयांना मुलाचे शेवटचे दर्शन झाले. या घटनेने कुटुंबियांवर दुःखाचा डोंगर कोसळला असून गावात शोकाकुल वातावरण निर्माण झाले आहे. मात्र या श्यामचा मृत्यू नेमका आजारी असल्यानेच झाला का ? असा प्रश्न उपस्थित होत आहे.