बीडच्या लुखामसला येथील उद्योजक गोविंद बरगे यांचा मृतदेह सोलापुरातील बार्शी गावात आढळल्यानं खळबळ उडाली. बरगे यांनी स्वत:वर गोळ्या झाडून आत्महत्या केली असल्याची माहिती आहे. प्रेयसीची भेट घेण्यासाठी ते सोलापुरात गेले होते. मात्र, त्यांचा मृतदेह कारमध्ये आढळला. त्यांच्या डोक्यात गोळी झाडली होती. दरम्यान,पोलिसांकडून तपास सुरू असून, बरगे यांनी आत्महत्या केली की त्यांची हत्या झाली? याचा तपास सुरू आहे.

गोविंद जगन्नाथ बरगे असे मृत तरूणाचे नाव आहे. ते बीड जिल्ह्यातील गेवराई तालुक्यातील लुखामसला गावातील रहिवासी होते. बरगे हे प्लॉटिंगचे व्यवसाय करत होते. त्यांचा व्यवसायात चांगला जम बसलेला होता. यादरम्यान त्यांचा संपर्क पारगाव थिएटरमधील नर्तिकेशी आला. दोघांची जवळीक वाढली. दोघांचेही प्रेमसंबंध निर्माण झाले.

या काळात बरगे यांनी प्रेयसीला सोन्याचांदीच्या नाण्यासह पावणेदोन लाखांचा मोबाईल गिफ्ट केला. मात्र, काही दिवसांपूर्वी त्यांच्यात वाद झाला. वाद मिटवण्यासाठी बरगे सोलापुरातील बार्शी तालुक्यातील सासुरे गावात गेले. चारचाकीतून त्यांनी गाव गाठलं.सोमवारी मध्यरात्री ते प्रेयसीच्या घरात पोहोचले, अशी माहिती समोर आली आहे.

मात्र, त्यानंतर गावकऱ्यांना कारमध्ये बरगे यांचा मृतदेह दिसला. त्यांनी तातडीने पोलिसांना याची माहिती दिली. पोलिसांनी घटनास्थळी जाऊन पाहिले असता त्यांना एक युवक गाडीमध्येच मृत अवस्थेत पडल्याचे दिसून आले. त्यांच्याजवळ एक पिस्तूलही आढळून आले असून, त्यातूनच त्यांनी स्वत: वर गोळीबार केल्याचा अंदाज व्यक्त केला जात आहे.

घटनास्थळी पोलिसांना काही गोष्टी संशयास्पद आढळून आल्या आहेत. त्यामुळे बरगे यांनी आत्महत्या केली की त्यांची हत्या झाली? याचा तपास पोलिसांकडून सुरू आहे.