पराग ढोबळे, नागपूर

नागपूरमध्ये भीषण अपघाताची घटना घडली. कार विहिरीमध्ये कोसळून तिघांचा दुर्दैवी मृत्यू झाला. नागपूरच्या बुटीबोरीमध्ये हा अपघात झाला. बुटीबोरी येथे राहणारे हे तिघे तरुण कारने एमआयडीसी परिसराच्या दिशेने जात असताना ही घटना घडली. तिघांचेही मृतदेह बाहेर काढण्यात आले असून शवविच्छेदनासाठी रुग्णालयात पाठवण्यात आले आहेत. पोलिसांकडून या अपघाताचा तपास सुरू आहे.

मिळालेल्या माहितीनुसार, नागपूरच्या बुटीबोरी येथे सोमवारी रात्री ११ ते ११.३० वाजताच्या सुमारास कार विहिरीमध्ये कोसळून अपघात झाला. या कारमधून तीन तरुण एमआयडीसीकडे जात होते. त्याचवेळी कार रस्त्यालगत असलेल्या कठडा नसलेल्या विहिरीत कोसळली. कारमध्ये असलेले तिघेही जण कारमध्येच अडकून राहिले. वेळीच बाहेर निघू न शकल्याने या तिघांचाही बुडून मृत्यू झाला.

घटनेची माहिती मिळताच बुटीबोरी पोलिसांनी, अग्निशमन दलाच्या कर्मचाऱ्यांनी रात्री उशिरा घटनास्थळी धाव घेतली. स्थानिक नागरिकांच्या मदतीने त्यांनी शर्थीचे प्रयत्न करत कार विहिरीतून बाहेर काढली. पण तोपर्यंत तिघांचाही कारमध्येच मृत्यू झाला. मिळालेल्या प्राथमिक माहितीनुसार, या ३ तरुणांपैकी एक जण कार चालवणे शिकत होता. त्याचदरम्यान हा अपघात झाला आणि तिघांचाही मृत्यू झाला.