नवनीत तापडिया

Chhatrapati SambhajiNagar News: शहराच्या मध्यवर्ती आगारात पहिली वातानुकूलित इलेक्ट्रिक बस दाखल झाली आहे. उद्यापासून छत्रपती संभाजीनगर ते पुणे मार्गावर ही शिवाई नावाची ई-बस धावणार आहे. यामुळे छत्रपती संभाजीनगरातून पुण्यात जाणाऱ्या प्रवाशांचा प्रवास सुकर होणार आहे. (Latest Marathi News)

छत्रपती संभाजीनगर शहराच्या मध्यवर्ती आगारात शिवाईच्या आणखी चार बस दाखल होणार आहे. त्यातील ३ बस दाखल झाल्या आहेत. म्हणजेच पहिल्या टप्प्यात एकूण पाच ई-बस मिळणार आहेत. या बसने प्रवाशांना अवघ्या साडेचार तासांत पुणे गाठता येणार आहे. छत्रपती संभाजीनगर विभागाला एकूण 200 बस मिळणार आहेत.

राज्यात 1 जून 2022 रोजी पुणे-अहमदनगर मार्गावर पहिली इलेक्ट्रिक बस सुरू झाली. टप्प्याटप्प्याने त्यांची संख्या वाढवण्याचा निर्णय घेण्यात आला होता. त्यानुसार छत्रपती संभाजीनगर एसटी विभागाला पहिल्या टप्प्यात पाच बस मिळणार आहेत. या बसमध्ये महिला प्रवाशांना तिकीटात 50 टक्के सवलत, ज्येष्ठांना मोफत प्रवास असेल.

या बससाठी विभागीय कार्यशाळेशेजारी इलेक्ट्रिक बसेस चार्जिंग सेंटर तयार करण्यात आले आहे. ही बस दीड तासात चार्ज होते. एकदा चार्ज केल्यानंतर 350 किमी धावेल. पुण्याचे अंतर 250 किमीपेक्षा कमी आहे. पुण्याला गेल्यावर पुन्हा बस चार्ज करून छत्रपती संभाजीनगरला येईल.