रायगडमधील म्हसळा तालुक्यातील गोरेगाव - म्हसळा रोडवर रिक्षाचा भीषण अपघात घडला. या भयंकर अपघातात शिवसेना (उद्धव बाळासाहेब ठाकरे) पक्षाचे शाखाप्रमुख संतोष सावंत यांच्यासह दोघांचा मृत्यू झाला. तर, चौघेजण जखमी झाले असल्याची माहिती आहे. सावंत यांच्या अपघाती निधनामुळे कणघरवर शोककळा पसरली आहे.

शिवसेना पक्षाचे शाखाप्रमुख संतोष सावंत यांचा अपघाती मृत्यू झाला आहे. या भीषण अपघाताची घटना खामगाव परिसरात रविवारी दुपारच्या सुमारास घडली. संतोष सावंत हे कणघरचे शाखाप्रमुख होते. त्यांची निष्ठावंत शिवसैनिक म्हणून ओळख होती. त्यांच्याकडे पक्षाचे शाखाप्रमुख हे पद होतं.

कुटुंबाच्या उदरनिर्वाहसाठी ते रिक्षाही चालवत होते. रविवारीही त्यांनी भाडे घेतले होते. दुपारी म्हसळा गोरेगावचे भाडे घेतले असल्याची माहिती आहे. गोरेगावकडे जातना ताम्हणे शिर्के ते कासार मलाई या वाटेवर त्यांच्या रिक्षाचा भीषण अपघात घडला. रिक्षा अनियंत्रित होऊन थेट डिव्हायडरवर जाऊन आदळली.

रिक्षा जोरात आदळल्यामुळे सावंत गंभीर जखमी झाले. या भीषण अपघातात त्यांचा जागीच मृत्यू झाला. तर, रिक्षामध्ये सहा प्रवासी होते. सहा प्रवासी गंभीर जखमी होते. स्थानिकांना माहिती मिळताच त्यांनी घटनास्थळी धाव घेतली. तसेच जखमींना तातडीने उपचारासाठी रूग्णालयात दाखल केले. मात्र, उपचारादरम्यान, २ प्रवाशांचा मृत्यू झाला. या अपघातात एकूण तिघांचा मृत्यू झाला. या घटनेनंतर परिसरात हळहळ व्यक्त करण्यात आली असून, सावंत यांच्या मृत्यूनंतर कुटुंबावर दु:खाचा डोंगर कोसळला आहे.