सचिन बनसोडे 

शिर्डी (अहमदनगर) : सबका मालिक एक असा संदेश देणाऱ्या साईबाबांच्या शिर्डीत देखील आषाढी एकादशीचा उत्साह दिसून येत आहे. शिर्डी माझे पंढरपूर ही भावना घेऊन आज साईभक्त शिर्डीत दाखल झाले आहेत. आषाढी एकादशी निमित्ताने साई प्रसादालयात भाविकांसाठी खास १२ टन साहित्य वापरून साबुदाणा खिचडीचा महाप्रसाद बनवण्यात आला आहे.

आज आषाढी एकादशी (Ashadhi Ekadashi) निमित्त पंढरपुरात भाविकांची प्रचंड गर्दी झालेली पाहण्यास मिळत आहे. विठुरायाचे दर्शन घेण्यासाठी रीघ लागली आहे. त्यानुसार शिर्डीत (Shirdi) देखील साई दर्शनासाठी भाविकांची प्रचंड गर्दी होत आहे. शिर्डीत येणाऱ्या भाविकांसाठी साई संस्थानकडून प्रसादालयात खास साबुदाणा खिचडीचा प्रसाद देण्यात आला आहे. तब्बल १२ टन साहित्याचा वापर यासाठी करण्यात आला आहे. यात साबुदाणा ६ हजार किलो, शेंगदाणे ५ हजार किलो व बटाटा २ हजार, तूप १ हजार किलो यासह मिर्ची असे साहित्य हा खिचडी महाप्रसाद बनवण्यासाठी वापरण्यात आले आहे.  

शिर्डीत येत असलेला प्रत्येक भाविक प्रसादाचा लाभ घेताना पाहण्यास मिळत आहे. शिर्डी पंचक्रोशीतील स्थानिक भाविक आवर्जून या प्रसादरूपी खिचडीचा आस्वाद घेण्यासाठी येत असतात. सोबत देशभरातुन आलेल्या भाविकांनाही प्रसाद भोजनात दररोज दिल्या जाणाऱ्या भाजी, पोळी, वरण- भाताऐवजी साबुदाणा खिचडी दिली जात आहे.