सचिन बनसोडे 
शिर्डी (अहिल्यानगर) : शिर्डीच्या आंतरराष्ट्रीय विमानतळावर दिवसा व रात्रीच्यावेळी देखील विमान तसेच हेलिकॉप्टरचे लँडिंग होत असते. यामुळे विमानतळाच्या २५ किलोमीटर परिघातील वायुक्षेत्रात प्रखर लेझर प्रकाश किरण आकाशात सोडण्यास बंदी घालण्यात आली आहे. याबाबतचे आदेश शिर्डी उपविभागीय अधिकारी माणिक आहेर यांनी जारी केले आहेत.

शिर्डी विमानतळ येथे दिवसा व रात्री वेगवेगळ्या विमान कंपन्यांची विमाने व हेलिकॉप्टर उतरत असतात आणि उड्डाण करीत असतात. दरम्यान रात्रीच्या वेळी वैमानिकांना दिशा आणि ठिकाण निश्चित करण्यासाठी धावपट्टीवर आणि हवाई वाहतूक नियत्रंण (एटीसी) टॉवरद्वारे लाईटचा उपयोग केला जातो. शिर्डी विमानतळ परिसरातील २५ किलोमीटर परिघात उच्च शक्तीच्या लेझरमुळे वैमानिकांचे लक्ष विचलित होणे आणि संभाव्य अक्षमतेमुळे विमानाच्या कार्यप्रणालीत गंभीर अडथळे येऊ शकतात.

लेझर किरणांमुळे धोका निर्माण होण्याची भीती 
सहज हाताळता येणाऱ्या (हॅंड हेल्ड लेझर) उपकरणाची कमी किंमत व बाजारातील सहज उपलब्धतेमुळे अशा घटनांची संख्या वाढून विमानाच्या महत्वाच्या टप्प्यामध्ये वैमानिक विचलीत होतात किंवा तात्पुरते अक्षम होतात. उड्डाण आणि लँडिंगच्या महत्वाच्या टप्प्यामध्ये अशा कृती विमानतळ परिसराच्या आसपास झाल्यास विमान वाहतुकीला अधिक धोका वाढण्याची शक्यता नाकारता येत नाही. परिणामी कानी दुर्घटना देखील होण्याची शक्यता निर्माण होत असते. 

सुरक्षेच्या दृष्टीने निर्णय 

प्रामुख्याने रात्रीच्या अंधारात लेझर किरणांमुळे वैमानिकाला काही अडथळा निर्माण होऊ नये व काही दुर्घटना घडू नये. अर्थात सुरक्षिततेच्या दृष्टीने विमान वाहतूकीला अडथळा येऊ नये, कोणतीही दुर्घटना घडू नये, यासाठी भारतीय नागरिक सुरक्षा संहिता २०२३ चे कलम १६३ अन्वये लेझर किरण वापरावर बंदी करण्यात आली आहे. त्या अनुषंगाने आदेश जारी करण्यात आले आहेत.