- सचिन बनसाेडे

Shirdi News : शिर्डी येथील साई संस्थान (sai sansthan shirdi) येथे सीआयएसएफ (CISF) ही केंद्रीय सुरक्षा यंत्रणा व आयएएस अधिकारी नको तसेच विविध मागण्यासाठी येत्या एक मे राेजी ग्रामस्थांनी शिर्डी बंदची (shirdi bandh) हाक दिली हाेती. दरम्यान पालकमंत्री राधाकृष्ण विखे पाटील (radhakrishna vikhe patil) यांची ग्रामस्थांनी भेट घेत चर्चा केली. या चर्चेत काही सकारात्मक गाेष्टी ठरल्याने ग्रामस्थांनी शिर्डी बंदचा निर्णय मागे घेतला आहे. त्याबाबत पालकमंत्री यांनी दुजाराे दिला. (Breaking Marathi News)

शिर्डीतील सर्वपक्षीय ग्रामस्थांनी एकत्र येऊन युवकांना साथ देत विविध मागण्यांसाठी तसेच साई संस्थानच्या निर्णयाविरोधात न्यायालयीन लढाई उभारण्याचा निर्णय बुधवारी घेतला. या निर्णयाकडे सरकारचे लक्ष खेचण्यासाठी महाराष्ट्र दिनी अर्थात 1 मे पासून शिर्डी शहर बेमुदत बंद ठेवण्याचा निर्णय जाहीर केला. त्याच दिवशी संध्याकाळी ग्रामसभेचे आयोजन करून चार विषयांचा ठराव घेण्याचे निश्चित केले हाेते.

दरम्यान आज (शुक्रवार) पालकमंत्री विखे पाटलांची ग्रामस्थांनी भेट घेतली. या भेटीत विखे पाटील यांनी ग्रामस्थांच्या विविध मागण्या जाणून घेतल्या. तसेच ग्रामस्थांच्या वतीने उच्च न्यायालयात हस्तक्षेप याचिका दाखल करणार असल्याचे सांगण्यात आले.

ग्रामसभेत ठराव घेऊन ग्रामस्थांच्या मागण्या उच्च न्यायालयापर्यंत पोहचवू. राज्य सरकार न्यायालयात बाजू मांडेल. शिर्डीशी संबंध नसणारी मंडळी जनहित याचिकेतून शिर्डीत हस्तक्षेप करतात अशी नाराजी याचिकाकर्त्यांसंदर्भात विखे पाटलांनी यावेळी व्यक्त केली.

Edited By : Siddharth Latkar