Dhule News : धुळे महापालिका शहरात जाणीवपूर्वक तणाव निर्माण करण्यासाठी व केवळ विशिष्ट लाेकांचे अतिक्रमण हटविण्यासाठीच अतिक्रमण माेहिम राबवत असल्याचा आराेप राष्ट्रवादी काॅंग्रेस पक्षाने (NCP Dhule) केला आहे. यामुळे धुळे शहरात सध्या महानगरपालिका प्रशासनातर्फे सुरू असलेल्या अतिक्रमण हटाव मोहिमेच्या विरोधात राष्ट्रवादी काँग्रेस पक्ष (शरद पवार गट) आक्रमक झाल्याचे पाहायला मिळत आहे. (Maharashtra News)

राष्ट्रवादी काँग्रेस पक्षाचे पदाधिकारी व कार्यकर्ते यांनी आज (बुधवार) पोलीस अधीक्षक कार्यालयात धाव घेतली. पदाधिका-यांनी अप्पर पोलीस अधीक्षक किशोर काळे यांच्याकडे पालिका प्रशासनातर्फे सुरू असलेली मनमानी अतिक्रमण कारवाई तात्काळ थांबविण्याची मागणी केली. यावेळी एनसीपीचे कार्यकर्ते आक्रमक झाल्याचे पाहायला मिळाले.

राष्ट्रवादी काँग्रेस पक्षाच्या पदाधिका-यांनी काही ठराविक सत्ताधाऱ्यांच्या सांगण्यावरून मनपा प्रशासनातर्फे ही अतिक्रमण हटाव मोहीम राबवली जात असल्याचा आरोप करण्यात आला. त्याचबरोबर मर्जीतील दुकानदारांची अतिक्रमणे यामध्ये हटविली जात नसल्याचा देखील आरोप करण्यात आला.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

या संदर्भात पोलीस प्रशासनातर्फे चौकशी करून यामागील सूत्रधार कोण याचा तपास करावा अशी मागणी राष्ट्रवादी काँग्रेस पक्षाच्या वतीने करण्यात आली आहे.

Edited By : Siddharth Latkar