Satara Phaltan Doctor girl Suicide news : साताऱ्यातील फलटण सरकारी रुग्णालयातील डॉक्टर तरुणीच्या आत्महत्या प्रकरणात PSI गोपाळ बदने (Gopal Badne) याने आत्मसमर्पण केलेय. शनिवारी रात्री बदने यांनी फलटणमध्ये पोलीस स्टेशनमध्ये आत्मसमर्पण केले. तीन दिवसांपासून पोलिसांकडून बदने यांचा शोध पोलिसांकडून घेतला जात होता. (Gopal Badne surrenders in Phaltan doctor suicide case)

गोपाळ बदने याने शनिवारी संध्याकाळी फलटण पोलीस स्टेशनमध्ये आत्मसमर्पण केले. त्यानंतर फलटण पोलिसांनी वैद्यकीय चाचणीसाठी रुग्णालयात नेण्यात आले. गोपाळ बदने याला आज न्यायालयात हजर केले जाणार असल्याची माहिती खात्रीलायक सूत्रांनी दिली. फलटण पोलिसांसमोर आत्मसमर्पण केल्यानंतर गोपाळ बदने याने प्रसारमाध्यमांना प्रतिक्रिया दिली. मी प्रामाणिक आहे. न्यायालय जो काही निर्णय देईल त्यावर माझा विश्वास आहे. माझा पोलीस प्रशासनावरही विश्वास आहे, असे गोपाळ बदने याने म्हटले.

फलटणमधील हॉटेलच्या खोलीत महिला डॉक्टराने गळफास लावून आत्महत्या केली. तिच्या हातावर काही मजकूर लिहला होता. पीएसआय गोपाळ बदने आणि प्रशांत बनकर या दोघांनी आत्महत्येसाठी कारणीभूत असल्याचे म्हटले होते. गोपाळ बदने याने आपल्यावर चारवेळा बलात्कार केल्याचाही गंभीर आरोप सुसाईड नोटमध्ये केला होता. या प्रकरणानंतर महाराष्ट्रात खळबळ उडाली. बदने याच्यावर गुन्हा दाखल करत पोलिसांनी तपास सुरू केला होता.

फलटण पोलीस गोपाळ बदनेच्या मागावर होते. मात्र ते गुंगारा देत फिरत होता. मोबाईल लोकेशनचा आधार घेऊन पंढरपूर बीड, पुणे आणि पंढरपूर भागात पोलिसांकडून शोधमोहीम सुरु होती. तीन दिवसानंतरही बदने पोलिसांच्या हाती लागला नाही. पण शनिवारी रात्री गोपाळ बदने स्वत:हून फलटण शहर पोलीस ठाण्यात हजर झाला. आता त्याच्या चौकशीतून कोणती नवीन माहिती समोर येणार, याकडे सर्वांच्या नजरा लागल्या आहेत.