ओंकार कदम, प्रतिनिधी...

Satara News: सातारा जिल्ह्यातून एक दुर्देवी घटना समोर आली आहे. साताऱ्याच्या उरमोडी धरणात दोन युवक बुडाल्याचा धक्कादायक प्रकार समोर आला आहे. यामधील एका युवकाचा मृतदेह सापडला असून दुसऱ्या तरुणाचा मृतदेह शोधण्याचे काम सुरू आहे. पाण्याचा अंदाज न आल्याने ही दुर्देवी घटना घडल्याचे सांगण्यात येत आहे.. (Satara Urmodi Dam News)

याबाबत अधिक माहिती अशी की, सातारा तालुक्यातील परळी येथे असलेल्या उरमोडी धरणात रविवारी दुपारी दोन युवक पोहण्यासाठी गेले होते. मात्र त्यांना पाण्याचा अंदाज न आल्याने धरण पात्रातच ते बुडाले. ही बातमी रविवारी सायंकाळी युवकांच्या कुटुंबीयांना समजली. त्यानंतर त्यांनी तात्काळ ही घटना शिवेंद्रसिंहराजे भोसले रेस्क्यू टीमला कळवली.

रात्री उशिरा अंधार असल्यामुळे शोध कार्य करताना अडथळा येत आल्याने सोमवारी सकाळी सातारा तालुका पोलीस निरीक्षक विश्वजीत घोडके तसेच शिवेंद्रसिंह रेस्क्यू टीम स्थानिक ग्रामस्थ व कातकरी यांच्या मदतीने शोध कार्य सुरू केले. (Latest Marathi News)

दरम्यान, सोमवारी सकाळी बाराच्या दरम्यान एका युवकाचा मृतदेह धरण पात्रातून बाहेर काढण्यात यश आले आहे. आणखी एक तरुण अद्याप बेपत्ता असून त्याचाही शोध घेण्याचे काम सुरू आहे. या दुर्देवी घटनेने परिसरात हळहळ व्यक्त केली जात असून पोलिस याबाबतचा अधिक तपास करत आहेत.. (Satara News)