सातारा, ता. २७ जुलै २०२४

राज्यभरात सध्या मुसळधार पावसाने धुमाकूळ घातला आहे. कोल्हापूर, सांगली जिल्ह्याला पुराने वेढा दिला असून अनेक ठिकाणी दरड कोसळल्याच्या घटना घडत आहेत.अशातच सातारा जिल्ह्याच्या जावळी तालुक्यातील सुलेवाडी येथील डोंगराला मोठमोठ्या भेगा पडल्याने डोंगर पायथ्याच्या रांजणी गावातील नागरिक भयभीत झाले आहेत.

याबाबत सविस्तर माहिती अशी की, डोंगरमाथ्यावर वसलेल्या जावळी तालुक्यातील घोटेघर आणि सुलेवाडी येथील डोंगराला मोठमोठ्या भेगा पडत असल्याने येथील नागरिक भयभीत झाले आहेत. डोंगर पायथ्याशी असणाऱ्या रांजणी गावात माळीणसारखी परिस्थिती निर्माण झाल्याने रांजणी व सुलेवाडीचे ग्रामस्थ जीव मुठीत घेऊन मुसळधार पावसात राहत आहेत.

घोटेघर येथील सुमारे २०० ते २५० लोकवस्तीच्या सुलेवाडी वस्तीच्या खालच्या बाजूस असणाऱ्या सुमारे २० ते २५ एकर क्षेत्राच्या शेतजमीन व डोंगर उताराला मोठमोठ्या दीड कीमी लांब व एक ते दीड फूट रुंद अशा भेगा पडल्या आहेत. मुसळधार पाऊस कोसळत असल्याने या भेंगांमध्ये पाणी जाऊन त्या वाढू लागल्या आहेत त्यामुळे भूस्खलन होण्याच्या भीतीने रांजणीचे ग्रामस्थ भयभित झाले आहेत.

दरम्यान, २०१९ साली याच ठिकाणी डोंगराला अशाच पद्धतीने भेगा पडल्या होत्या. या वेळी शासनाने सुलेवाडी गावातील काही लोकांना तात्पुरते स्थलांतरित केले होते. तर रांजणी येथे ६० लोकांसाठी निवारा शेड उभारले होती. परंतु ती अद्याप ग्रामपंचायतीच्या ताब्यात दिली नसल्याने अपूर्ण असल्याने ती आपत्तीग्रस्तांना दिली नाहीत.