Satara News:

एकीकडे आरक्षणाच्या मागणीसाठी मराठा बांधव एकवटले असतानाच धनगर समाजही आरक्षणाच्या मुद्द्यावरुन आक्रमक झाला आहे. राज्यातील विविध भागात आरक्षणाच्या मागणीसाठी धनगर समाज रस्त्यावर उतरला आहे. याच मागणीसाठी खंडाळ्यातील छत्रपती शिवाजी महाराज चौकात धनगर समाजाकडून आंदोलन करण्यात आले.

याबाबत सविस्तर माहिती अशी की, धनगर समाज बांधवांचा आरक्षणासाठी राज्य सरकारविरुद्ध एल्गार पाहायला मिळत आहे. आरक्षण देण्याच्या मागणीसाठी खंडाळ्यातील छत्रपती शिवाजी महाराज चौकात धनगर बांधवांकडून आंदोलन करण्यात येत आहे.

आंदोलनात मेंढ्या आणि घोड्यांसह मोठ्या संख्येने धनगर बांधव या आंदोलनात सहभागी झाले आहेत. आंदोलक पुणे - सातारा महामार्ग अडवणार असून या ठिकाणी मोठा पोलीस फौजफाटा तैनात करण्यात आला आहे. या मोर्चामध्ये मोठ्या संख्येने सहभागी व्हावे असे आवाहन धनगरवाडीचे माजी उपसरपंच जिजाबा काळे यांनी केले आहे...

दरम्यान, मंगळवार, (१९, सप्टेंबर) लाही राज्यात धनगर समाजाकडून विविध ठिकाणी जोरदार आंदोलन करण्यात आले होते. आरक्षणाच्या मागणीसाठी सांगली तसेच तुळजापूरमध्ये झालेल्या आंदोलनात मोठ्या संख्येने धनगर समाजबांधव सहभागी झाले होते. (Latest Marathi News)