इंदूरमधील राजा रघुवंशीचं प्रकरण ताजे असतानाच सांगली जिल्ह्यातून एक धक्कादायक बातमी समोर येत आहे. दुसऱ्या बायकोने लग्नाच्या १५ दिवसानंतर नवऱ्यावर कुऱ्हाडीने हल्ला करून संपवलं आहे. पतीकडून वारंवार शारीरिक संबंधाची मागणी केली जात होती. मात्र, ती कायम विरोध करत होती. यामुळे संतप्त झालेल्या बायकोने नवऱ्याची हत्या केली. या घटनेनंतर पोलिसांनी आरोपी पत्नीविरोधात गुन्हा दाखल केला आहे. या घटनेनंतर परिसरात खळबळ उडाली आहे.

कुपवाड एमआयडीसी पोलीस ठाण्याचे सहाय्यक निरीक्षक दीपक भांडवलकर यांनी दिलेल्या माहितीनुसार, राधिका असं २७ वर्षीय आरोपी तरूणीचे नाव आहे. तर, अनिल असे ५६ वर्षीय मृत व्यक्तीचे नाव आहे. मंगळवारी रात्री दोघांमध्ये भांडण सुरू होतं. भांडणाचा राग राधिकाच्या पोटात खदखदत होता. दुसऱ्या दिवशी म्हणजेच बुधवारी पहाटे १२:३० च्या सुमारास अनिल झोपलेला असताना राधिकाने अनिलच्या डोक्यात कुऱ्हाडीने वार केले. या हल्ल्यात अनिलचा जागीच मृत्यू झाला.

ही घटना घडल्यानंतर राधिकाने सगळी हकिकत आपल्या चुलत भावाला सांगितली. पोलिसांनी घटनेसंदर्भात माहिती देताना सांगितले की, 'अवघ्या १५ दिवसांपूर्वी राधिकाचं अनिलसोबत लग्न झालं होतं. अनिलच्या पहिल्या बायकोचं कर्करोगाने निधन झाले होते. लग्नानंतर तो राधिकाकडे शारीरिक संबंध ठेवण्यासाठी आग्रह धरत होता. यामुळे राधिका संतापली होती. संतप्त राधिकाने भांडणानंतर नवऱ्यावर कुऱ्हाडीने वार केले'.

या घटनेची माहिती मिळताच पोलिसांनी घटनास्थळी धाव घेत मृतदेह शवविच्छेदनासाठी रूग्णालयात पाठवलं. तसेच तपास करीत राधिकाला बेड्या ठोकल्या. पोलीस अधिकाऱ्यांनी सांगितले की, राधिकाला कुपवाड येथील घरातून बेड्या ठोकल्या आहेत. या प्रकरणी राधिकाविरूद्ध बीएनएसच्या कलम १०३(१) अंतर्गत गुन्हा दाखल केला आहे. या घटनेची माहिती गावात वाऱ्यासारखी पसरताच खळबळ उडाली आहे.