कुणी म्हणे... मी विराट कोहलीसारखा कट मारलाय, तर कुणी म्हणे... माझा हेयर कट बॉलीवूड सिनेस्टारसारखा आहे... असं म्हणून विद्यार्थी शाळेत एकमेकांना चिडवत धमाल मस्ती करत असतात. मात्र, सांगलीच्या मिरज तालुक्यातील लक्ष्मीवाडीच्या जिल्हा परिषद शाळेतील मास्तरांनी यावर एकदम 'कडक' उपाय शोधून काढलाय... होय... जिथे केस कापण्यासाठी सलूनवाल्यांना पालकांना नव्हे, तर दस्तुर खुद्द गुरूजींना फोन करावा लागतो... वेळ प्रसंगी गुरूजी सूचना देण्यासाठी थेट सलूनला धडक देतात...मग इथे ना फॅशनचा अतिरेक चालतो, ना कसले वेडेवाकडे कट मारता येतात. गुरुजींच्या देखरेखीखाली एकदम साधे, स्वच्छ आणि शिस्तबद्ध केस कापले जातात. एकूणच काय तर कटिंग विद्यार्थ्यांची... मात्र स्टाईल गुरुजींची... विद्यार्थी वेडेवाकडे केस कापून शाळेत येऊ नयेत, यासाठी शाळेनं अनोखा 'सलून पॅटर्न' राबवलाय.

एव्हंढच नव्हे तर, शाळेनं राबवलेला अनोखा उपक्रम यशस्वी झाल्याचं शाळेच्या मुख्याध्यापकांनी सांगितलंय... मुलांची हेअर स्टाईल अलीकडे पालकांसाठी चांगलीचं डोकेदुखी बनली होती. मात्र, शाळेच्या अनोख्या उपक्रमामुळे येथील विद्यार्थ्यांना मोठा फायदा झालाय तर पालकही समाधानी आहेत.

लक्ष्मीवाडीतल्या विद्यार्थ्यांच्या डोक्यावरच्या केसांची स्टाईल ही काही काळासाठी असते. मात्र डोक्यात रुजलेली शिस्त आयुष्यभर साथ देते. खरंतर, केस बारीक कापल्याच्या क्षुल्लक कारणावरून विद्यार्थ्यानं आत्महत्या केल्याचा धक्कादायक प्रकार समोर आला होता. त्यामुळे लक्ष्मीवाडीच्या शिस्तप्रिय गुरुजींचा हा अनोखा प्रयोग.. विद्यार्थ्यांच्या व्यक्तिमत्त्वाला ‘परफेक्ट कट’ देणारा म्हणावं लागेल...