छत्रपती संभाजीनगर : कांद्याची लागवड मोठ्या प्रमाणात झाली आहे. कांदा काढणीनंतर शेतकऱ्यांना विक्रीसाठी कांदा बाहेर न्यावा लागत होता. यामुळे जिल्ह्यात कांदा खरेदी विक्री केंद्र सुरु करण्याची मागणी होती. त्यानुसार संभाजीनगर जिल्ह्यातील फुलंब्री येथे कांदा खरेदी विक्री केंद्रला सुरुवात झाली असून आजच्या पहिल्याच दिवशी मोठ्या प्रमाणात कांदा विक्रीसाठी आणण्यात आला होता. 

छत्रपती संभाजीनगर जिल्ह्यातील फुलंब्री तालुक्यात कांदा उत्पादक शेतकऱ्यांची संख्या मोठी असून यंदा देखील कांदा लागवड मोठ्या प्रमाणात करण्यात आली होती. परिसरात कांदा उत्पादन घेतल्यानंतर देखील कांदा विक्रीसाठी शेतकऱ्यांना छत्रपती संभाजीनगर व इतर ठिकाणी जावे लागत असल्याने शेतकऱ्यांना मोठा खर्च लागत होता. परिणामी शेतकऱ्यांना मिळणार भाव व वाहतुकीसासाठी लागणार खर्च याचा ताळमेळ बसत नव्हता. 

पहिल्याच दिवशी शेतकऱ्यांची गर्दी 

दरम्यान तालुक्यात कांदा खरेदी विक्री केंद्र सुरु करण्याची मागणी शेतकऱ्यांची होती. शेतकऱ्याची वाढती मागणी लक्षात घेऊन फुलंब्री मतदारसंघाचे आमदार अनुराधा चव्हाण यांच्या संकल्पनेतून कांदा लिलाव प्रक्रिया कृषी उत्पन्न बाजार समितीच्या परिसरात राबविण्यात आली. याची सुरूवात आजपासून (१ जून) करण्यात आली. पहिल्याच दिवशी मोठ्या संख्येने शेतकरी कांदा विक्रीसाठी दाखल झाले होते. 

२१०० रुपयांपर्यंत मिळाला भाव 

दरम्यान आजच्या पहिल्याच दिवशी शेतकऱ्यांनी मोठ्या प्रमाणात कांदा बाजार समितीच्या आवारात विक्रीसाठी आणला होता. छत्रपती संभाजीनगरसह इतर ठिकाणाहून व्यापारी लिलावात सहभागी झाले होते. या कांदा लिलाव प्रक्रियेत शेतकऱ्यांना प्रतिक्विंटल १६०० ते २१०० रुपयांपर्यंत कांद्याला भाव मिळालेला आहे. यामुळे शेतकऱ्यांमध्ये समाधान व्यक्त करण्यात येत आहे.