रामू ढाकणे 
छत्रपती संभाजीनगर : राज्यात मान्सूनचे आगमन झाले असताना छत्रपती संभाजीनगर जिल्ह्यातील पैठण तालुक्यात देखील जोरदार पावसाने हजेरी लावली आहे. जिल्ह्यात होत असलेल्या दमदार पावसामुळे शेतकऱ्यांना दिलासा मिळाला असून पेरणीच्या कामाची लगबग सुरु झाली आहे. 

संभाजीनगर जिल्ह्यातील पैठण शहरासह तालुक्यातील काही गावात आज दुपारच्या सुमारास मुसळधार पाऊस झाला. पाचोड, बालानगर, कडेठण यासह परिसरातील काही गावांमध्ये अर्धा ते पाऊण तास जोरदार वाऱ्यासह आणि विजेच्या कडकडाटासह पाऊस (Rain) झाला. यामुळे उकाड्यापासून हैराण झालेल्या नागरिकांना दिलासा मिळणार आहे. तर अनेक ठिकाणी रस्त्यांना नाल्यांचे स्वरूप आल्याचे पाहायला मिळाले. 

पेरणीला होणार सुरवात 

दमदार पावसाची शेतकरी (Farmer) आतुरतेने वाट पाहत होता. दरम्यान आज दुपारी चांगला पेरणी योग्य पाऊस झाला. अनेक ठिकाणी शेतीच्या मशागतीची कामे पूर्ण झाली असून शेतकरी अद्यापही पावसाच्या प्रतीक्षेत आहे. मात्र मान्सून पूर्व पेरणी करणाऱ्या शेतकऱ्यांसाठी नक्कीच फायद्याचा आहे.