छत्रपती संभाजीनगर : उद्धव ठाकरे यांच्यासोबत गद्दारी करून गेलेल्‍यांना क्षमा नाही. मंत्रिमंडळाचा खूप चांगला (Sanbhajinagar) बदल झाला आहे. अपात्र ठरणारे १६ आमदार फक्त आता १६ दिवसांचे राहिलेत. म्हणूनच त्यांचे खाते कमी करून टाकले असल्‍याचे वक्‍तव्‍य शिवसेना (Shiv Sena) नेते माजी खासदार चंद्रकांत खैरे यांनी केले आहे. (Maharashtra News)

छत्रपती संभाजीनगर येथे शिवसेना नेते माजी खासदार चंद्रकांत खैरे यांनी माध्‍यमांशी संवाद साधताना राज्‍य सरकारवर निशाणा साधला आहे. खैरे म्‍हणाले, की देवेंद्र फडणवीस यांनी आता चूप बसून फक्त लोकांची सेवा करावी, अशी त्यांना विनंती करायची आहे. याला पकडा त्याला फोडा; हे बंद करा. लोकांची सेवा करा लोकांना सांभाळून घ्या.

सरकारची उतरती कळा

अर्थमंत्रीपद हे अजित पवारांना मिळेल हे मी आधीच सांगितले होते. या सरकारला आता उतरती कळा लागलेली आहे. सर्व आमदारांना सांभाळता सांभाळता देवेंद्र फडणवीस (Devendra Fadanvis) यांचे वजन सुद्धा कमी होत चालले आहे. देवेंद्र फडणवीस काय खातात त्यांनी मला सांगितले आहे. मी त्यांना हात जोडून विनंती करतो उरलेल्या दिवसात लोकांची सेवा करा.