छत्रपती संभाजीनगर : छत्रपती संभाजीनगर जिल्ह्यातील शिल्लेगावमध्ये दरोडाच्या तयारीत असलेल्या टोळीला ग्रामीण पोलिसांनी जेरबंद केले. पोलिसांच्या कारवाईमुळे आणखी एक सशस्त्र दरोडा टळला आहे. शिल्लेगाव पोलिसांनी सिनेस्टाईल कारवाई करीत तीन दरोडेखोरांना पकडल्याने शिल्लेगाव परिसरातील जिल्ह्यातील आणखी एका दरोड्याची घटना टळली आहे. 

रात्रीच्या अंधारात चोरटे संधीचा फायदा घेत चोरी करत असतात. बंद घरांना हेरून किंवा घरातील व्यक्तींना शस्त्राचा धाक दाखवून दरोडा टाकत असतात. दरम्यान गंगापूर तालुक्यातील लासूर स्टेशन येथील स्टेट बँक ऑफ इंडिया बँकेच्या बाहेर एक व्यक्ती रेकी करत असल्याची माहिती पोलिसांना मिळाली होती. पोलिसांनी तात्काळ याची दखल घेत सदर बँकेच्या ठिकाणी गेले असता एकजण दिसून आला. 

शंभर गुन्ह्यांची कबुली 

यानंतर पोलिसांनी घटनास्थळ गाठून रेकी करणाऱ्या चोरट्याला सिनेस्टाईल पाठलाग करून पकडले. त्याला पोलिसी खाक्या दाखवताच त्यांनी आत्तापर्यंत १०० गुन्हे केले असल्याचे कबूल केले. तर त्यांच्याकडून चोरीचे दोन मोबाईल, कात्री, गलूल, सोलापूर येथून चोरलेली दुचाकी, स्क्रू ड्राइवर, ब्लूटूथ हेडफोन आदी मुद्देमाल जप्त केला. तसेच त्याचे अन्य दोघा साथीदारांना देखील पोलिसांनी ताब्यात घेतले आहे.  

बँकेत सुरक्षा रक्षकही नाही 

दरम्यान स्टेट बँकेत सध्या सुरक्षेचेही धिंडवडे उडालेले दिसून येत आहे. कोट्यावधी रुपयांचा व्यवहार असलेल्या या बँकेत साधा सुरक्षा रक्षक तैनात नाही. त्यामुळे संशयित चोरटे बँकेत रेकी करत असल्याची पुसटशी कल्पना बँक प्रशासनाला नव्हती. मात्र शिल्लेगाव पोलिसांच्या सतर्कतेमुळे मोठी चोरीची घटना टळली.