रामू ढाकणे 

छत्रपती संभाजीनगर : पावसाळ्यात जुन्या धोकादायक इमारती पडून मोठी दुर्घटना होण्याची शक्यता अधिक असते. या दृष्टीने महापालिकेकडून दरवर्षी धोकेदायक असलेल्या इमारतींच्या मालकांना नोटीस बजावली जाते. मात्र यंदा छत्रपती संभाजीनगर शहरातील धोकादायक इमारती तातडीने सील करण्यात येणार आहेत. 

दरवर्षी पावसाळा (Rain) सुरु होण्यापूर्वी शहरात धोकेदायक ठरणाऱ्या इमारतींचे ऑडिट केले जात असते. त्यानुसार मालकांना नोटीस बजावून इमारत खाली करण्याबाबत सूचना दिल्या जातात. हि प्रक्रिया दरवर्षीची असून यंदा देखील शहरात महापालिकेकडून पाहणी करण्यात आली आहे. त्यानुसार महापालिकेने शोधलेल्या अति धोकादायक इमारती पाडण्यात याव्या. त्याला विरोध झाल्यास तातडीने या इमारती सील कराव्यात; असा इशारा पालिकेने दिला आहे. तशा सूचना महापालिका (Sambhajinagar) प्रशासनाने अधिकाऱ्यांना दिले आहेत.  

नाल्यांवर बसविणार जाळ्या 

त्याबरोबरच नालेसफाईची उर्वरित कामे वेगाने पूर्ण करावीत आणि बुडून होणारे मृत्यू टाळण्यासाठी नाल्यांना जाळ्या लावाव्यात; अशाही सूचना पालिका प्रशासनाने केल्या. तीन दिवसांपूर्वी शहरात ड्रेनेजच्या खड्ड्यात पडून तरुणाचा मृत्यू झाल्याची घटना घडली होती. त्यानंतर मनपाने सतर्कता म्हणून शहरातील नाल्यात कचरा टाकणाऱ्यांचा बंदोबस्त करण्यासाठी जाळ्या बसवण्याची सूचना केली आहे.