माधव सावरगावे, संभाजीनगर

Sambhajinagar Ishwari Bankar Sucide News पुण्यातील वैष्णवी हगवणे प्रकरण ताजे असताना संभाजीनगरमध्ये एका महिलेने सासरच्या मंडळींकडून होणाऱ्या जाचाला कंटाळून आत्महत्या केली असल्याची घटना घडली आहे. धक्कादायक म्हणजे भाजीत केस निघाल्याच्या कारणावरून निर्दयी पतीने महिलेला जखमी होईपर्यंत मारहाण केली असल्याचं उघड झालं आहे. ईश्वरी बनकर असे या महिलेचं नाव असून याप्रकरणी छावणी पोलिसांनी पतीसह सात जणांना अटक केली आहे.

मिळालेल्या माहितीनुसार, २५ वर्षीय ईश्वरीचा २८ जून २०२० रोजी अजय अशोक बनकर याच्यासोबत विवाह झाला. ते भावसिंगपुऱ्यातील श्रावस्ती कॉलनीत कुटुंबियांसोबत राहत होते. अजय रोज दारू पिऊन घरी येत ईश्वरीला मारहाण करून शारीरिक व मानसिक छळ करत होता. सासरकडील अन्य नातेवाईकही सातत्याने घरी येऊन तिला त्रास देत होते. ईश्वरीने ही बाब आई-वडिलांना सांगितली. त्यांनी दोघांची समजूत काढून एकत्र राहण्याचा सल्ला दिला. मात्र, अजयच्या वागण्यात बदल झाला नाही.

ईश्वरीचे वडील राजू भुजंग यांनी मुलीचे लग्न थाटामाटात लावले होते. अजयला ५ ग्रॅम सोन्याची अंगठी, २ तोळ्याची साखळी, मुलीसाठी ५ तोळे सोने, २ लाख रुपये हुंडा, फ्रिज, कूलर सोफा व सर्व घरगुती साहित्य दिले होते. तरीही अजय माहेरहून पैसे आणण्यासाठी पत्नीवर दबाव टाकत होता. त्याने विकत घेतलेल्या प्लॉटचे हप्तेही तिच्या वडिलांनाच भरण्याची मागणी करीत होता.

इतकंच काय तर भाजीत केस निघाल्याच्या कारणावरून निर्दयी अजयने ईश्वरीला बेदम मारहाण केली. या मारहाणीत ती जबर जखमी झाली. पतीसह सासरच्यांकडून सुरू असलेला छळ असह्य झाल्याने ईश्वरीने गळफास घेत आत्महत्या केली. या प्रकरणी पोलिसांनी घटनास्थळी पोहचून पंचनामा केला आहे. तसेच ७ जणांना ताब्यात घेऊन गुन्हा दाखल केला आहे. या घटनेनंतर परिसरात खळबळ उडाली असून अजून किती वैष्णवी आणि ईश्वरीचा अशाप्रकारे बळी जाणार? असा संतप्त सवाल उपस्थित केला जात आहे.