सांगलीतील शिराळा विधानसभा मतदारसंघात शरद पवारांची राष्ट्रवादी आणि भाजपमध्ये चुरशीची लढत झाली. या मतदारसंघात कोणाची जादू चालणार, याकडे साऱ्यांचे लक्ष लागलं आहे. सकाळ समूहाच्या एक्झिट पोलनुसार, या मतदारसंघात शरद पवार गटाचं पारड जड असल्याचं बोललं जात आहे. या एक्झिट पोलने भाजपचे टेन्शन वाढवलं आहे.

शिराळा विधानसभा मतदारसंघात शरद पवार गटाकडून मानसिंग नाईक रिंगणात उतरले होते. तर भाजपकडून सत्यजीत देशमुख रिंगणात उतरले होते. या दोन प्रमुख उमेदवारांमध्येच प्रमुख लढत दिसून आली. या मतदारसंघात मानसिंग नाईक यांच्या शरद पवारांनी सभा घेतली होती. त्याचा फायदा शिराळ्यात मानसिंग नाईक यांना झाल्याचं पाहायला मिळत आहे.

काय आहेत मतदारसंघातील समीकरण?

शिराळा विधानसभा मतदारसंघ राष्ट्रवादीचा बालेकिल्ला म्हणून ओळखला जातो. या बालेकिल्ल्यात मानसिंग नाईक हे अनेक वर्षांपासून निवडून येतात. त्यांनी अनेक विकासकामे केली आहे. त्यांच्या अनेक संस्था आहेत. अनेक निधी त्यांनी तालुक्यात आणला आहे. त्यांच्या विरोधात भाजपने सत्यजीत देशमुख यांना उमेदवारी दिली होती.

या मतदारसंघातून महाडिक गटाकडून उमेदवारी मागण्यात आली होती. मात्र, त्यांना डावललं गेलं. त्यानंतर देवेंद्र फडणवीस यांनी मध्यस्थी करून महाडिक गटाला पाठिंबा देण्यास सांगितलं. त्यामुळे सत्यजीत देशमुख यांचंही पारडं जड आहे. मात्र, मतदारसंघातील विकासकामे पाहता, मानसिंग नाईक विजयी होण्याची शक्यता आहे.