Ganpati : सोलापुरातील (solapur) होटगी - कुंभारी रस्त्यावरील गणपती मंदिरात (temple) अचानक भाविकांची गर्दी वाढली. ही गर्दी वाढण्याचे प्रमुख कारण तपासलं असता या परिसरात गणपतीच्या डोळ्यातून पाणी येत असल्याचे काेणी तरी सांगितलं. त्यामुळे भाविक उत्सुकतेपाेटी मंदिरात येत हाेते.

भाविकांची दर्शनासाठी गर्दी झाल्याने काहींनी हा प्रकार अंनिसच्या कानावर घातला. त्यानंतर भाविकांनी अथवा नागरिकांनी अफवांवर विश्वास ठेवू नये असे आवाहन अंधश्रद्धा निर्मूलन समितीच्या कार्यकर्त्यांकडून करण्यात आले.

कुंभारी रोडवरील स्वामीनारायण गुरुकुल स्कूलच्या जवळ सिद्धरामेश्वरांनी स्थापन केलेल्या अष्टविनायकांपैकी बेनक गणपती मंदिर आहे. या गणपतीच्या डोळ्यातून अश्रू वाहत असल्याची बातमी हा हा म्हणता परिसरात पसरली. भाविकांनी लागलीच दर्शनासाठी गर्दी करून हार, श्रीफळ अर्पण केले. ही अफवा असून या मागचे शास्त्रीय कारण काय त्याचा शोध घेतल्यानंतर नेमका प्रकार निदर्शनास येईल असे अंनिसच्या कार्यकर्त्यांनी स्पष्ट केले आहे.

Edited By : Siddharth Latkar