पंढरपूर - सांगोला जवळ असलेल्या वाकी शिवणे गावातील जिल्हा मध्यवर्ती सहकारी बँकेच्या शाखेवर अज्ञात चोरट्यांनी मध्यरात्री सशस्त्र दरोडा टाकला. यामध्ये सात लाख रुपयांची रोकड चोरट्यांनी पळवून नेली. या घटनेनंतर सांगोला तालुक्यात मोठी खळबळ उडाली आहे.

हे देखील पहा -

येथील जिल्हा मध्यवर्ती सहकारी बँकेच्या शाखेचे चोरट्यांनी गॅस कटरच्या सहाय्याने दरवाजा तोडून आत प्रवेश केला. बँकेतील लॉकर ही गॅस कटरच्या सहाय्याने कट करून लॉकरमध्ये ठेवलेली सात लाख रुपयांची रोकड चोरट्याने पळवून नेली शिवाय बँकेतील महत्त्वाचे कागदपत्र व दस्तऐवज चोरट्यांनी जाळून टाकले आहेत.

ही घटना आज सकाळी येथील ग्रामस्थांच्या लक्षात आल्यानंतर याची माहिती सांगोला पोलिसांना देण्यात आली. या घटनेची माहिती मिळताच सोलापूर जिल्हा पोलीस अधीक्षक तेजस्वी सातपुते मंगळवेढा उपविभागीय पोलीस अधिकारी राजेश्री पाटील सांगोला पोलीस ठाण्याचे पोलीस निरीक्षक सुहास जगताप आदींसह पोलीस घटनास्थळी दाखल झाले आहेत. या घटनेनंतर पोलिसांनी चोरट्यांचा शोध सुरु केला आहे.

Edited By - Shivani Tichkule