नंदुरबार : महाराष्ट्राच्या विधानसभा आणि लोकसभा मतदार यादीतील पहिलं गाव अक्कलकुवा तालुक्यातील मनिबेली आज देखील विकासापासून दूर आहे. जांगठी ग्रामपंचायत अंतर्गत चापट्टीपाडा, मनिबेली गावादरम्यान ३ किलोमीटर रस्त्यावर मोठ्या प्रमाणात दरड कोसळल्याने रस्ता पूर्णपणे बंद झाल्याने नागरिकांना रहदारीसाठी मोठी अडचण निर्माण झाली आहे.

या भागात आज देखील डांबरीकरणाचे रस्ते झाले नाहीत. ठेकेदारद्वारे माती आणि खडी टाकून तयार केलेल्या या रस्त्यावरून पायी चालणे देखील कठीण झाले आहे. मोटरसायकल आणि चारचाकी वाहन जाऊ शकत नाही. या भागातील मोटरसायकल स्वरांना ३ किलोमीटर आपल्या वाहनाला धरून मार्गक्रमण करावे लागते. आजारी माणसांना तर (झोळीतून) बांबूलेन्सद्वारे दवाखान्यापर्यंत घेऊन जावे लागत आहे.

हे देखील पहा-

दुर्गम भागातील या गाव पाड्यांना ये- जा करण्याकरिता प्रधानमंत्री आणि मुख्यमंत्री योजनेच्या नावाखाली रस्ते मंजूर केले जातात. परंतु, लोकप्रतिनिधी, अधिकारी, ठेकेदार यांच्या भ्रष्ट कारभारामुळे रस्त्यांचे कामच पूर्ण होत नाही. दुर्गम भागातील अनेक रस्ते १० वर्षापासून काम सुरू असताना देखील अद्याप डांबरीकरण झाले नाही. ज्या रस्त्याचे काम झाले आहे. ते वर्षभरातच खराब होतात.

जांगठीहून नर्मदा नदीच्या काठापर्यंत असलेल्या चिमलखेडी रस्त्याची देखील हीच अवस्था आहे. मागील आठवड्यातच चांदसैली घाटात दरड कोसळल्याने उपचाराअभावी एका महिलेचा मृत्यू झाल्यानंतर प्रशासनाला जाग आली होती. जांगठी ग्रामपंचायत अंतर्गत चापट्टीपाडा, मनिबेली गावादरम्यान दरड कोसळल्याने अनेक दिवसापासून रस्ता बंद आहे. परंतु, प्रशासनाने अद्याप तो रास्ता दुरुस्त केला नाही. सरपंच दिलवरसिंग पाडवी यांनी रस्त्यावरील दरड हटवून, रस्त्याचे काम लवकर पूर्ण करावे अशी मागणी केली आहे.

Edited By- Digambar Jadhav