सचिन जाधव, साम टीव्ही

महादेवाचा अवतार असल्याचे सांगून महिलेवर अत्याचार करणाऱ्या ऋषिकेश वैद्य याला पुणे लष्कर कोर्टात हजर केलं. ऋषिकेश वैद्य याने लैंगिक अत्याचार केला नसून महिलेने त्याला उत्तेजित केल्याचा युक्तिवाद त्याच्या वकिलांनी केलाय. ऋषिकेश वैद्य याला खोट्या गुन्ह्यात अडकवण्यात आल्याचाही दावा आरोपीच्या वकिलांनी केला. आता या प्रकरणात ऋषिकेश वैद्य याला ६ एप्रिलपर्यंत पोलीस कोठडी सुनावण्यात आली आहे.

आरोपी ऋषिकेश वैद्य याचे वकील पवन कुलकर्णी यांनी म्हटलं की, फिर्यादीने ऋषिकेश वैद्य याला फेसबुकवर मैत्रीची विनंती पाठवली होती. वैद्य याने लैंगिक अत्याचार केला नाही. तर महिलेने त्याला उत्तेजित केले. त्याचे मोबाईल सगळे घेतले आहेत. दोघांच्याही मोबाईलवर मेसेज आहे. लॉज वर गेले असे म्हटले आहे, तर सीसीटीव्ही चेक करावा, असा गुन्हा घडला नाही'.

'महिला स्वतःहून गेली आहे. आरोप करणारी महिला ३५ वर्षीय असून लग्न झालंय. आरोपीची पार्श्वभूमी चांगली आहे. धार्मिक प्रवचन करणारे आहेत. महिला एवढ्या गप्प का राहिल्या? गुंगीचे औषध देऊन म्हटलं आहे, तसे काही नाही. खोट्या गुन्ह्यात अडकवण्यात आलं आहे, असे वकील कुलकर्णी यांनी म्हटलं.

वकील पवन कुलकर्णी यांनी पुढे म्हटलं,'ऋषिकेश वैद्य याची बाजू कोर्टात मांडली. सरकारी वकिलांनी १४ दिवस पोलीस कोठडी मागितली. परंतु आम्ही प्रत्येक गोष्टीचे खंडन करून त्यांनी असे कुठलेही कृत्य केलं नाही, असे आमचे म्हणणे आहे. घटना २०२३ ते २५ दरम्यान घडली असून त्याला गुन्हा दाखल करण्यास उशीर का झाला, याचे सबब कारण सांगितलं नाही'.

आरोपीचा भाऊ धनंजय वैद्य याने सांगितलं की, आरोप चुकीचे आहेत. ते सगळे बनवण्यात आलं आहे. न्यायालयावर आमचा विश्वास आहे. आम्ही न्यायालयात आमची बाजू मांडू. बाकी आमचे वकील न्यायालयात बाजू मांडतील'.