राज्याच्या राजकारणाचे लक्ष वेधून घेणारी बातमी डोंबिवलीतून समोर येतेय. भाजपचे महाराष्ट्र प्रदेशाध्यक्ष रविंद्र चव्हाण यांनी मोदींच्या वाढदिवसाचा मुहूर्त साधत डोंबिवलीत 'सेवा संकल्प अभियाना'चे रणशिंग फुंकले आहे. वरवर पाहता हा केवळ महाआरती आणि वाढदिवसाचा कार्यक्रम वाटत असला तरी, यामागे भाजपने आगामी राजकीय रणनीतीचा भाग आहे.

बाप्पाच्या दरबारातून थेट घरोघरी पोहोचण्याची रणनीती!

डोंबिवलीकरांचे श्रद्धास्थान असलेल्या श्री गणेश मंदिर संस्थानात मंगळवारी भक्तीमय वातावरणात ग्रामदैवताची महाआरती संपन्न झाली खरी, पण त्यातून भाजपनं पक्षाची मोर्चेबांधणीला सुरुवात केलीय. पंतप्रधान मोदींच्या वाढदिवसानिममित्त देशभरात आशीर्वादाचा दिवा हे अभियान राबवण्यात आले.

डोंबिवलीमध्येही असाच उपक्रम राबवण्यात आला. मात्र त्याच्या मागून राजकीय रणनीती आखण्यात आलीय. या अभियानाच्या माध्यमातून थेट जनसामान्यांच्या घरापर्यंत पोहोचण्याचा आणि भाजपच्या विकसित भारत संकल्पाची घरोघरी चर्चा घडवून आणण्याचा हा भाजपचा प्रयत्न होता असं बोललं जातंय.

यावेळी बोलताना आमदार रविंद्र चव्हाण म्हणाले की, "हा आशीर्वादाचा दिवा मोदीजींच्या सेवाव्रताचे आणि विकसित भारताच्या संकल्पाचे प्रतीक आहे. आपणही आपल्या घरी किंवा परिसरात असाच दिवा प्रज्वलित करून आपल्या लाडक्या मोदीजींना शुभाशीर्वाद द्यावेत," असं आवाहन चव्हाणांनी केलं. यावेळी भाजपचे कल्याण जिल्हाध्यक्ष नंदू परब, कल्याण-डोंबिवलीचे उपमहापौर राहुल दामले, गटनेते शशिकांत कांबळे, पश्चिम मंडळ अध्यक्षा प्रिया जोशी, नगरसेवक मंदार हळबे, नगरसेवक समीर चिटणीस, नगरसेविका ज्योती पाटील, नगरसेविका मंदा पाटील, नगरसेविका रंजना पेणकर, नगरसेविका मृदुला नाख्ये, भाजपा युवा मोर्चा कल्याण जिल्हा उपाध्यक्ष अनमोल म्हात्रे यांच्यासह अनेक मान्यवर, लोकप्रतिनिधी, इतर पदाधिकारी, कार्यकर्ते आणि मोठ्या संख्येने नागरिक उपस्थित होते.