जालना : केंद्रीय मंत्री रावसाहेब दानवे यांचा एक व्हिडीओ सध्या सोशल मीडियावर तुफान व्हायरल होत आहे. या व्हिडीओत समर्थ रामदास स्वामी हेच शिवरायांचे गुरू होते, असं विधान दानवे करताना दिसून येत आहे. इतकंच नाही, तर दानवे (Raosaheb Danve) यांनी शिवरायांचा एकेरी भाषेत उल्लेख देखील केल्याचं व्हिडीओमध्ये दिसून येत आहे. त्यांच्या या कृतीनंतर शिवप्रेमींमधून संताप व्यक्त केला जात आहे. दरम्यान, वादग्रस्त विधानानंतर रावसाहेब दानवे यांनी व्हिडीओ शेअर करत माफी मागितली आहे.

गेल्या काही दिवसांपासून भाजपमधील नेत्यांकडून छत्रपती शिवाजी महाराज यांच्याबाबत वादग्रस्त विधानं केली जात आहे. सुरूवातीला राज्यपाल कोश्यारी, नंतर मंगलप्रभात लोढा, त्यानंतर प्रसाद लाड आणि आता थेट केंद्रीय मंत्री रावसाहेब दानवे यांनी छत्रपती शिवाजी महाराजांबद्दल वादग्रस्त विधान केलं आहे. त्यामुळे पुन्हा एकदा नव्या वादाला तोंड फुटलं असून शिवप्रेमींमधून संताप व्यक्त केला जात आहे. (Maharashtra Politics News)

काय म्हणाले रावसाहेब दानवे?

रावसाहेब दानवे यांनी व्हायरल झालेल्या व्हिडीओ क्लिपवर खुलासा केला आहे. गेल्या वर्षभरात किंवा दोन वर्षात आपण असले कुठल्याच प्रकारचे विधान केले नसल्याचं दानवे यांनी म्हटलं आहे. दोन वर्षांपूर्वी नाशिक दौऱ्यावर असताना राज्यपाल यांच्या विषयी पत्रकारांनी प्रतिक्रिया विचारली असता, अनवधानाने माझ्या तोंडातून महाराजांबद्दल एकेरी भाषेचा उल्लेख झाला होता, त्यावेळी मी देशातील जनतेची माफी मागितली होती, आज पुन्हा जनतेची माफी मागतो, असं म्हणत दानवेंनी जनतेची माफी मागितली आहे.

Edited By - Satish Daud