Ram Mandir News

मातीच्या लाखो पणत्या, कलेचा अद्भुत संगम आणि हजारो हातांच्या परिश्रमातून प्रभू श्रीरामांची सुंदर अशी प्रतिकृती तयार करण्याची किमया जळगाव जिल्ह्यातील चाळीसगावकरांनी करून दाखवली आहे. ही प्रतिकृती तब्बल 10 हजार स्वेअर फूटात साकारण्यात आली आहे. त्यासाठी मातीचे 2 लाख 10 हजार दिवे वापरण्यात आलेत. भाजपचे खासदार उन्मेष पाटील यांच्या संकल्पनेतून हा उपक्रम राबवण्यात आलाय. ही कलाकृती पाहण्यासाठी चाळीसगावात जनसागर लोटला आहे. संपूर्ण देशभरात मातीच्या दिव्यांचा वापर करून श्रीरामाची एवढी अवाढव्य प्रतिकृती कुणीही साकारलेली नाही. हा विश्वविक्रम जळगावच्या नावे असल्याचा दावा केला जात आहे.

डोंबिवलीत श्रीराम मंदिर रथाच्या प्रतिकृतीची भव्य मिरवणूक

मुख्यमंत्री एकनाथ शिंदे यांच्या मार्गदर्शनाखाली खासदार श्रीकांत शिंदे यांनी अयोध्या श्रीराम मंदिर रथाच्या प्रतिकृतीची उभारणी केली आहे. डोंबिवली पश्चिममध्ये या भव्य रथाची मिरवणूक बुधवारी मोठ्या जयघोषात निघाली. डोंबिवली पश्चिम येथील पु.बा. भावे सभागृहापासून अयोध्या राम मंदिर रथयात्रेला प्रारंभ झाला. कल्याण जिल्हाप्रमुख गोपाळ लांडगे यांनी श्रीराम रथाचे मनोभावे पूजन केलं.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

यावेळी फुलांची उधळण करीत जय श्रीरामच्या घोषणांनी परिसर दणाणून गेला. यावेळी डोंबिवली शिवसेना शहरप्रमुख राजेश मोरे यांच्यासह पदाधिकारी व शिवसैनिक मोठ्या संख्येने राम रथ मिरवणुकीत सहभागी झाले होते. पश्चिम येथील पु बा भावे सभागृहापासून सुरू झालेल्या रथयात्राची संपूर्ण डोंबिवलीतील प्रमुख रस्त्यावरून मिरवणूक काढण्यात आली. डोंबिवलीकर मोठ्या संख्येने यामध्ये सहभागी झाले होते.