>> जितेश कोळी

रत्नागिरी : महाराष्ट्र नवनिर्माण सेनेचे प्रमुख राज ठाकरे (Raj Thackeray) सध्या कोकण दौऱ्यावर आहे. तेथे ते पदाधिकाऱ्यांच्या भेटीगाठी घेत आहेत. आज त्यांनी खेड येथील पदाधिकाऱ्यांशी संवाद साधला. यावेळी त्यांनी जे अंगावर येतील त्यांना शिंगावर घ्यायची तयारी ठेवा, असं राज ठाकरे यांनी कार्यकर्त्यांना सांगितलं. (Maharashtra Politics News)

जे अंगावर येतील त्यांना शिंगावर घ्यायची तयारी ठेवा. तुमच्यासाठी वकिलांची फौज तयार ठेवेन, असे आश्वासन राज ठाकरे यांनी खेड येथे मनसे पदाधिकारी, कार्यकर्त्यांना दिले. जसे समोरचे वागतील, तसंच आपण पण वागायचं. त्यांनी हात उचलला तर आपणही हातच उचलला पाहिजे, असं राज ठाकरे यांनी म्हटलं.

लवकरच कोकणात मनसे पक्ष बळकट करण्यासाठी विशेष प्रयत्न केले जातील. येत्या जानेवारी महिन्यात चिपळूण येथे माझी जाहीर सभा होईल, असं देखील राज ठाकरे यांनी कार्यकर्त्यांना सांगितलं.

गायब वैभव खेडेकर आज दिसले

मनसे अध्यक्ष राज ठाकरे यांच्या कोकण दौऱ्यात गायब असणारे मनसेचे राज्य सरचिटणीस वैभव खेडेकर आज मात्र दौऱ्यात सहभागी झाल्याचे पाहायला मिळाले. खेड शहरातील द. ग. तटकरे सभागृहात आयोजित करण्यात आलेल्या मनसे पदाधिकारी, कार्यकर्ता संवाद मेळाव्यात वैभव खेडेकर यांनी राज ठाकरे यांचे शाल, पुष्पगुच्छ देऊन स्वागत केले. त्यामुळे नाराजीच्या सुरू असलेल्या चर्चाना अखेर पूर्णविराम मिळाला आहे.