सचिन जाधव, साम प्रतिनिधी

मागील २४ तासात राज्यातील अनेक जिल्ह्यांमध्ये पावसाने जोरदार बॅटिंग केली. विदर्भ, मराठवाडा, कोकण आणि मध्य महाराष्ट्रातील काही भागांना रविवारी आणि सोमवारी अवकाळी पावसाचा तडाखा बसला. उन्हाळ्यात पावसाळा सुरू झाल्यानं शेतकरी हवालदिल झालेत. दरम्यान हवामान विभागाने पुढील दोन ते तीन दिवस पावसाचे असणार असल्याचा अंदाज वर्तवलाय.

दक्षिणेकडील येणाऱ्या बाष्पयुक्त वाऱ्याचे प्रमाण वाढल्यामुळे गेले काही दिवस तापमान ३० पेक्षा जास्त झाला आहे. अशा परिस्थितीत ढग तयार होऊन हा पाऊस पडत आहे. पुढील २ ते ३ दिवस दक्षिण महाराष्ट्रासह विदर्भात पाऊस पडणार आहे. दक्षिण महाराष्ट्रातील काही जिल्ह्यात रविवारी पाऊस झाला आहे. येणाऱ्या काही दिवसाचा अंदाज बघितला तर सांगली, सोलापूर,धाराशिव लातूर,नांदेड,हिंगोली तसेच पूर्व विदर्भातील बहुतांश जिल्ह्यात पाऊस पडण्याची शक्यता आहे. विदर्भातील काही जिल्ह्यांना येलो अलर्ट देण्यात आला आहे. विजेच्या गडगडाटसह पाऊस पडू शकतो.

पुढील दोन ते तीन दिवस हलक्या,मध्यम स्वरूपाचा पाऊस पडण्याची शक्यता हवामान विभागाने वर्तवली आहे. दक्षिण मध्य महाराष्ट्रात हलक्या स्वरूपाचा पाऊस पडणार आहे, तर विदर्भात विजेच्या गडगडांसह जास्त पाऊस पडेल, त्यामुळे सतर्कतेचा इशारा देण्यात आला आहे. काही शेतकरी गारपाटी ही होईल अशी भीती व्यक्त करत आहेत. मात्र राज्यात कुठेही आता तरी गारपीट होण्याची शक्यता नाहीये.

गारपीट होण्यासारखं वातावरण पूरक नाही. हिवाळ्याकडून उन्हाळ्याकडे जाताना वातावरण बदलत आहे. तापमान वाढत कमी होतं या महिन्याच्या शेवटपर्यंत असं राहील मात्र मार्चनंतर तापमान वाढत राहण्याची शक्यता आहे, असं हवामान प्रमुख पुणे विभाग एस. डी. सानप म्हणालेत.

मराठवाड्यातील धाराशिवसह हिंगोलीत सोमवारी सकाळी पावसाच्या सरी कोसळल्या. धाराशिव शहरासह जिल्ह्याच्या काही भागात मध्यम ते हलक्या स्वरुपाचा पाऊस झाला. लातूर शहरात मध्यरात्री पावसाने हजेरी लावली. यवतमाळच्या राळेगाव, मारेगाव, महागाव,आर्णी, उमरखेड, पुसद,दिग्रस तालुक्यात दुपारी गारपीठ आणि वादळी वाऱ्यासह अवकाळी पावसाचा फटका बसला.रब्बी हंगामातील गहू, हरबरा, पालेभाज्या या पिकांना मोठा फटका बसला आहे.