सचिन कदम, रायगड

मुंबई-गोवा महामार्गावरील (Mumbai-Goa Highway) वाहतूक ठप्प झाली आहे. वादळी वाऱ्यामुळे या महामार्गावर मोठे झाड कोसळले. त्यामुळे महामार्गावरील दोन्ही बाजूची वाहतूक ठप्प झाली आहे. सध्या मुंबई-गोवा महामार्गावर मोठी वाहतूक कोंडी झाली आहे. वाहनांच्या लांबच लांब रांगा लागल्या आहेत. एकाच ठिकाणी अडकल्यामुळे प्रवाशांचे हाल होत आहे.

रायगडमध्ये वादळी वाऱ्यासह मुसळधार पाऊस पडत आहे. या वादळाचा फटका मुंबई- गोवा महामार्गावरील वाहतुकीला बसला आहे. माणगाव रेल्वे स्टेशनजवळ मुंबई-गोवा महामार्गावर मोठे झाड पडले. त्यामुळे या महामार्गावरील दोन्ही बाजूची वाहतूक पूर्णपणे ठप्प झाली आहे. महामार्गावर वाहनांच्या लांबच लांब रांगा लागल्या आहेत.

महामार्गावर मोठ-मोठे कंटेनर, कार, एसटी बसेस यांची मोठी रांग लागली आहे. एकाच ठिकाणी अडकून राहिल्यामुळे प्रवासी हैराण झाले आहेत. या घटनेची माहिती मिळताच मदतकार्य यंत्रणेने घटनास्थळी धाव घेतली आहे. सध्या रस्त्याला पडलेले झाड बाजूला हटवण्याचे काम युद्धपातळीवर सुरू आहे. घटनास्थळी रायगड पोलिसांनी देखील धाव घेतली आहे.

दुसरीकडे वादळी वाऱ्यामुळे रायगडच्या श्रीवर्धन तालुक्यातील बोर्ली गावानजीक रस्त्यावर मोठे झाड कोसळले आहे. झाड कोसळल्यामुळे श्रीवर्धन ते बोर्ली मार्गावरील वाहतूक ठप्प झाली आहे. यामुळे दोन्ही दिशेकडून जाणारी वाहतूक ठप्प झाली आहे. त्यामुळे प्रवाशांचे हाल होताना दिसत आहे.