सचिन कदम, रायगड

राष्ट्रवादी काँग्रेस अजित पवार गटाचे नेते सुधाकर घारे यांनी एकनाथ शिंदे यांच्या शिवसेनेवर जोरदार हल्लाबोल केलाय. शिंदे गटाचे आमदार महेंद्र थोरवे म्हणजे रायगडमधील वाल्मीक कराड असल्याची टीका त्यांनी केली. यासोबत त्यांनी एकनाथ शिंदेंच्या शिवसेनेबाबत त्यांनी गंभीर वक्तव्य केलंय. एकनाथ शिंदे यांचा पक्ष हा पळून जाऊन फितूर झालेला पक्ष असल्याचा गंभीर आरोप सुधाकर घारे यांनी केलाय.

तसंच,'पळून जाऊन सत्ता काबीज करणे म्हणजे फितुरीच आहे आणि हे सगळ्या महाराष्ट्राने पाहिलंय. अजित पवार यांनी एका तासात भाजपला पाठिंबा देत सत्तेत सामील झाले. यांच्यासारखा गोवा, गुवाहाटी असा पळून जाणारा आमचा पक्ष नाही.', अशा शब्दात सुधाकर घारे यांनी शिंदे यांच्या शिवसेनेवर टीका केली. आमदार महेंद्र थोरवे यांनी टेबलावर केलेल्या डान्सची त्यांनी यावेळी आठवण करून दिली.

राष्ट्रवादी काँग्रेसचे नेते सुधाकर घारे यांनी आमदार महेंद्र थोरवे यांच्यावर गंभीर आरोप करताना सांगितले की, 'महेंद्र थोरवे म्हणजे रायगडमधील वाल्मीक कराड आहेत.' महेंद्र थोरवे यांच्या कथित दादागिरी आणि गुंडगिरीचा पाढा यावेळी त्यांनी वाचून दाखवला. ० राष्ट्रवादी काँग्रेस अजित पवार गटाच्या वतीने सुधाकर घारे यांनी कर्जतमध्ये पत्रकार परिषद घेऊन थोरवेंवरती शाब्दिक हल्ला केला. दोन दिवसांपूर्वी महेंद्र थोरवे यांनी राष्ट्रवादी काँग्रेसचे प्रदेशाध्यक्ष सुनील तटकरे यांच्यावर जोरदार टीका केली होती.

दरम्यान, आमदार महेंद्र थोरवे यांच्याविरोधात कर्जतमध्ये राष्ट्रवादी काँग्रेस पक्ष आक्रमक झाला आहे. मंत्री भरत गोगावले यांच्या अभिष्टचिंतन सोहळ्यादरम्यान आमदार थोरवे यांनी महाडमध्ये सुनील तटकरे यांच्यावर केलेल्या जोरदार टिकेचा कर्जत राष्ट्रवादी कार्यकर्त्यांनी निषेध केला. थोरवे यांनी कर्जतमध्ये भ्रष्टाचार केला आहे, थोरवे प्रशासनावर दबाव आणत असल्याचा आरोप करत राष्ट्रवादी कार्यकर्त्यांनी थोरवे यांचा निषेध केला. थोरवे यांनी मतदारसंघात विकास काम केली नाहीत, त्यामुळे सुनिल तटकरे, आदिती तटकरे यांच्याविरोधात बोलून थोरवे प्रसिद्धी मिळवत असल्याचा आरोप सुधाकर घारे यांनी केला.